Astanada elimizdiń úzdik jas ekonomısteriniń esimderi ataldy

ASTANA. QazAqparat - Búgin Astana qalasynda qazaqstandyq joǵarǵy oqý oryndaryndaǵy ekonomıkalyq mamandyqtardyń stýdentteri arasynda ǵylymı-zertteý jáne taldaý qyzmetterin yntalandyrý boıynsha «Jas sarapshy» respýblıkalyq baıqaýynyń jeńimpazdaryn marapattaý boıynsha resmı saltanat ótti, dep habarlaıdy «Bolashaq» qaýymdastyǵynyń baspasóz qyzmeti.

Jeńimpaz atanǵandar: Aıgerim Ashyqbaeva (1 oryn) - Sh. Esenov atyndaǵy Kaspıı memlekettik tehnologııalar jáne ınjınırıng ýnıversıtetiniń stýdenti; Anara Abılakımova (2 oryn) - Qazaqstan-Brıtan tehnıkalyq ýnıversıtetiniń stýdenti; Ekaterına Popova (3 oryn) - M.Qozybaev atyndaǵy Soltústik Qazaqstan memlekettik ýnıversıtetiniń stýdenti, Qýanysh Muldajanov (3 oryn) - L.N.Gýmılev atyndaǵy Eýrazııa Ulttyq ýnıversıtetiniń stýdenti.

«Bul baıqaý maǵan elimizdiń ekonomıkalyq salasyn damytýdaǵy ózimniń kózqarasymmen bólisýge múmkindik berdi. Jumystarym joǵary baǵalanǵanyna jáne Ekonomıkalyq zertteýler ınstıtýtynda kásibı synaqtan ótý múmkindigi paıda bolǵanyna óte qýanyshtymyn. Men úshin bul tájirıbe meniń kásibı ósýime óte jaqsy yqpal etedi dep oılaımyn», - dep oıymen bólisti Aıgerim Ashyqbaeva.

Baıqaý qazaq jáne orys tilderinde ótkizildi.

«JAS SARAPShY-2014» baıqaýy kúzdiń basynda jarııalanǵan bolatyn, 30 qyrkúıekke deıin stýdentter ekonomıkalyq taqyryptaǵy esselerin jáne ózderi týraly aqparattardy jiberdi.

Jastar mynadaı taqyryptarda ózderiniń oılarymen bólisti: Qazaqstan-2050; Qazaqstanda eńbek naryǵyn damytýdyń máseleleri men bolashaǵy; servıstik ekonomıka; aýyl aýmaqtaryn turaqty damytý; QR shekaralas aýmaqtary - ekonomıkalyq ósý mejeleri retinde.

Baıqaýǵa respýblıkamyzdyń 40 JOO-synan 220-ǵa jýyq suranymdar kelip tústi. Aldyn ala irikteý nátıjeleri boıynsha 30 qatysýshy tańdap alyndy.

Odan ári stýdentterdiń aldynda «Qazaqstan-2050» ekonomıkasy jańa qurylymynyń ǵylymı talaptary; Qazaqstanda adam kapıtalynyń sapasyn arttyrý; QR jasyl ekonomıkany damytý; Biryńǵaı Ekonomıkalyq Keńistiktegi Qazaqstannyń shaǵyn jáne orta bıznesiniń básekege qabilettiligi; Qazaqstannyń shaǵyn qalalaryndaǵy ońtaıly baılanys; Qazaqstanda servıstik ekonomıkany jáne qyzmet kórsetý salasyn damytý týraly keıs-tapsyrmalardy oryndaý mindeti turdy.

Keısterdi úzdik oryndap shyqqan 10 stýdent elordaǵa áńgimelesýge shaqyryldy. Konkýrstyq komıssııa áńgimelesýdiń qorytyndysy boıynsha úsh júldegerdi iriktep aldy.

Jeńimpazdar dıplomdarǵa, baǵaly júldeler men syılyqtarǵa ıe boldy. Sonymen qatar stýdentter QR Ulttyq ekonomıka mınıstrliginiń Ekonomıkalyq zertteýler ınstıtýtynda synaqtan ótý múmkindigin aldy.

Marapattaý saltanatyna konkýrstyq komıssııanyń músheleri: «Bolashaq» qaýymdastyǵy Keńesiniń múshesi, QR Ulttyq ekonomıka vıtse-mınıstri Mádına Abylqasymova, «Ekonomıkalyq zertteýler ınstıtýty» AQ prezıdenti Maqsat Muqanov, «Bolashaq» qaýymdastyǵy Keńesiniń múshesi, «QazMunaıGaz» AQ Taldaý jáne boljam jasaý departamentiniń dırektory Dármen Sádýaqasov, «Ekonomıkalyq zertteýler ınstıtýty» AQ sarapshylary qatysty.

Bilim dodasyn «Bolashaq» Qaýymdastyǵy, Qazaqstan Respýblıkasy Mádenıet jáne sport mınıstrliginiń qoldaýymen «Ekonomıkalyq zertteýler ınstıtýty» AQ pen Qazaqstan Respýblıkasy Ulttyq ekonomıka mınıstrligi uıymdastyrdy.