Astanada eldegi sot júıesiniń aqparattyq-kommýnıkatsııalyq tehnologııasyn damytý jaıy talqylandy

ASTANA. QazAqparat - Búgin Joǵarǵy sotta «Qazaqstan Respýblıkasy sottar júıesiniń aqparattyq-kommýnıkatsııalyq tehnologııasyn damytýdy ulttyq kózqarasta qalyptastyrý» taqyrybyna «Workshop» ótti, dep habarlaıdy QR Joǵarǵy sotynyń baspasóz qyzmeti.

Іs-shara «Qazaqstannyń Úshinshi jańǵyrýy: jahandyq básekege qabilettilik» Memleket basshysy N.Nazarbaevtyń Qazaqstan halqyna joldaýyn iske asyrý sheńberinde 2017-2022 jyldarǵa arnalǵan Qazaqstan Respýblıkasy Joǵarǵy sotynyń aqparattyq-kommýnıkatsııalyq tehnologııasynyń strategııasyn» ázirleý maqsatynda ótkizilýde.

«Workshop» Joǵarǵy sottyń jáne Astana qalasy sotynyń sýdıalary, Departamenttiń basshylyǵy men qyzmetkerleri, Sot tóreligi akademııasynyń ǵylymı-oqytýshy quramy jáne magıstranttary, advokatýranyń, medıatorlar assotsıatsııasynyń ókilderi qatysty.

Qatysýshylar ár túrli taqyryptarymen 5 topqa bólindi. Bul «Strategııalyq josparlaý», «Qylmystyq sot isin júrgizýdi avtomattandyrý», «Azamattyq sot isin júrgizýdi avtomattandyrý», «Ákimshilik sot isin júrgizýdi avtomattandyrý», «Bıznes-protsesterdi qoldaýshylardy avtomattandyrý». Pikir-talasqa 45 adam qatysty.

Ár top músheleri sot júıesiniń aldynda turǵan mindetterdi talqylap, ár qatysýshynyń pikiri men usynystaryn tyńdady. Qatysýshylar óz qyzmetterinde kezdesetin aqparattyq tehnologııalardy qoldanýymen jáne paıdalanýyna baılanysty máselelerdi talqylady.

«Workshop» aıaqtalǵannan keıin uıymdastyrýshylar taqyryptyq toptar boıynsha barlyq bastamalar men usynystardy jınaqtady. Taldaý jáne óńdeý jasalǵannan keıin departament barlyq baǵyttar boıynsha neǵurlym mańyzdy bastamalar tizimin qalyptastyratyn bolady. Bul usynystar 2017-2022 jyldarǵa arnalǵan Joǵarǵy sotttyń aqparattyq-kommýnıkatsııalyq tehnologııasynyń strategııasyna engiziletin bolady.