Astanada "El birligi doktrınasy" jobasy talqylandy

ASTANA. Jeltoqsannyń 7-si. QazAqparat /Jasulan Amanbaıuly/ - Astanada "El birligi doktrınasy" jobasyn talqylaýǵa negizdelgen «Qazaqstannyń ulttyq jáne memlekettik biregeıligi» atty dóńgelek ústel otyrysy ótti,

dep habarlaıdy QazAqparat.

Otyrys barysynda S.Seıfýllın atyndaǵy Qazaq agrotehnıkalyq ýnıversıtetiniń, L.N.Gýmılev atyndaǵy Eýrazııa ulttyq ýnıversıtetiniń fılosof ǵalymdary men professorlary, QR Parlamenti Senatynyń depýtattary álemdik daǵdarys jaǵdaıynda etnosaralyq jáne konfessııaaralyq kelisimderdiń qazaqstandyq modelin odan ári jetildirý tájirıbesi men joldaryn túıistirý máselelerin saralady.

Dóńgelek ústel otyrysynda QR Parlamenti Senatynyń depýtaty, QR Ulttyq akademııasynyń akademıgi Ǵarıfolla Esim baıandama jasap, Elbasy Nursultan Nazarbaevtyń  El birligi doktrınasyna aıryqsha mańyz berip otyrǵanyn atap kórsetti. «Qazaqstandaǵy ult biregeıligi máselesi Qazaqstan úshin óte ózekti. Sebebi, Qazaqstan jerinde 130 ulttyń balasy bas qosqan. Osy turǵyda Elbasy N.Nazarbaevtyń usynǵan El birligi doktrınasy jobasy Qazaqstannyń ult biregeıligi, jalpy etnosaralyq máselelerge negizdeme bolady», deı kele, «Doktrına jobasy Qazaqstanda turyp jatqan halyqtyń birligin nyǵaıtyp qana qoımaı, bizdiń eldegi qoǵamnyń damý jolyn budan da ozyq, budan da órkenıetti baǵytqa túsiredi», dep atap ótti Ǵ. Esim.

Qatysýshylar basqosý kezinde Qazaqstandaǵy ultaralyq, qoǵamdyq tózimdilikti bilim berý jáne tárbıe berý júıesi arqyly, quqyqtyq mádenıetti arttyrý arqyly damytý týraly usynystar daıyndady.