Astanada ekinshi ındýstrıaldy park salynady
− Astana dástúrli túnde el ekonomıkasyna ınvestıtsııa tartý boıynsha kóshbasshylar qatarynda. 2024 jyly elorda ekonomıkasyna 1 trln 900 mlrd teńgeden astam ınvestıtsııa tartyldy jáne aldyńǵy jylmen salystyrǵanda 13,1 paıyz ósim baıqaldy, − dedi H. Ákimjanov qalalyq máslıhat otyrysynda.
Onyń aıtýynsha, jeke ınvestıtsııalar úlesi shamamen 71% quraıdy (1,1 trln teńge) jáne ótken jylǵy kórsetkishten 12,4% ósim bar.
Ónerkásiptik óndiris kólemi 6,7% ósimmen 2,5 trln teńgeni qurady, óńdeý ónerkásibinde 9,8% ósimmen 2,3 trln teńgeniń ónimi óndirildi.
Ónerkásiptik jobalardyń úlesi negizinen arnaıy ekonomıkalyq aımaq aýmaǵynda shoǵyrlanǵan, onda 345 mlrd teńge ınvestıtsııa somasyna 130 joba ornalastyrylǵan. Onyń ishinde 70 ónerkásiptik nysan iske qosylǵan jáne tolyqqandy jumys istep tur, 60-y iske asyrý satysynda.
− Astana AEA aýmaǵyndaǵy №1 ındýstrıaldy park respýblıkada óndiris kólemi boıynsha kóshbasshy ekenin atap ótkim keledi. Óndiris jumys isteýdiń barlyq kezeńinde 83% ortasha júkteme men 8,6 trln teńgege jetti. Sondaı-aq, salyq aýdarymdary, eksport kólemi boıynsha jáne barlyq arnaıy ekonomıkalyq aımaqtar boıynsha kóshbasshy atandy. №1 ındýstrıaldy parktiń oń tájirıbesin eskere otyryp, memlekettik-jekeshelik áriptestik tetigin qoldaný arqyly №2 ındýstrıaldy park jobasyn iske asyrý jumystary jalǵasýda, - dedi H. Ákimjanov.
Búginde 409 gektar jer ýchaskesi anyqtaldy, tehnıkalyq-ekonomıkalyq negizdeme ázirlenip, memlekettik saraptamanyń oń qorytyndysy alyndy. Konkýrstyq qujattama ázirlenip, ekonomıkalyq qorytyndy alý úshin ýákiletti organdarǵa jiberildi.
− Bıyl qurylys jumystarynyń birinshi kezegi bastalady jáne 2026 jyly aıaqtaý josparlanýda. Jobany qarjylandyrýǵa qatysty Báıterek holdınginiń mehanızmi arqyly jeńildetilgen 6 paıyz mólsherlemesimen qaıtarymdy qaryz tartylady, - dedi spıker.
Eske sala keteıik, buǵan deıin Astanadaǵy «Qazaqstan» sport kesheniniń qurylysy qashan aıaqtalatyny aıtylǵanyn jazǵan edim.