Astanada eki kúnde buryn-sońdy jasalǵan 12 qylmys ashylyp, izdeýdegi 9 qylmysker ustaldy

ASTANA. QazAqparat - Eki kúnge sozylǵan "Quqyqtyq tártip" jedel aldyn alý sharasy kezinde astanalyq ІІD qyzmetkerleri buryn-sońdy jasalǵan 12 qylmysty ashty. Іzdeýde júrgen 9 qylmysker ustaldy, dep habarlaıdy Astana qalalyq ІІD baspasóz qyzmetinen.

Sondaı-aq Qazaqstan Respýblıkasyna kelý erejesin buzǵany úshin 105 shetel azamaty quryqtalyp, onyń 34-i Astana qalasynyń ІІD qabyldap-taratý ornyna ornalastyryldy.

Astana qalasynyń ІІD Ákimshilik polıtsııa basqarmasynyń polıtsııa polkovnıgi Igor Gorbýnovtyń aıtýynsha, elordalyq polıtseıler 2 myńnan astam ákimshilik quqyq buzýshylyqty anyqtady, onyń ishinde 800-den astam fakti qoǵamdyq oryndarda alkogoldi ishimdikti ishý, 203-i abattandyrý erejesin buzý, 177-i fakti azamattardyń usaq buzaqylyq jasaýy bolsa, 67 jasóspirim túngi ýaqytta úılerinen tys oryndarda zańdy ókilderinsiz tabylǵan.

18 naýryzǵa qaraǵan túni beıtanys azamattar "Mersedes" kóligin úı aýlasynan aıdap ketip, jábirlenýshige 650 myń teńge kóleminde materıaldyq zalal keltirdi. Dál sol kúni jedel aldyn alý sharasynyń barysynda jol-patrýldik jáne krımınaldy polıtsııa qyzmetkerleri eki kúdiktini quryqtady. Urlanǵan avtokólik ıesine qaıtaryldy. Atalmysh fakti boıynsha tergeý amaldary júrgizilýde.

Jol qozǵalysyn baqylaý barysynda jol-patrýldik polıtsııa qyzmetkerleri 300 jyldamdyq rejiminiń buzyshylyǵyna tosqaýyl qoısa, 276 júrgizýshi kólikti qaýipsizdik belbeýin taqpaı basqarǵany úshin, 185-i uıaly telefonmen sóıleskeni úshin, 16 júrgizýshi kólikti alkogoldik ishimdik ishken kúıde basqarǵany úshin quryqtalǵany jóninde aıtty.

Esterińizge salsaq, "Quqyqtyq tártip" jedel aldyn alý is-sharasy qoǵamdyq oryndar men kóshelerdegi quqyq buzýshylyqtardyń jolyn kesý jáne elordada tıisti quqyqtyq tártipti qamtamasyz etý maqsatynda 17-19 naýryz aralyǵynda Naýryz meıramy qarsańynda júrgizildi.