Astanada Dúnıejúzilik kóshpendiler oıyndaryna volonterlerdi irikteý bastaldy
Besinshi dúnıejúzilik kóshpendiler oıyndaryn daıyndaý jáne ótkizý dırektsııasy elordalyq JOO-lar men kolledjderdiń stýdentterine aqparattyq-túsindirý jumystaryn bastady. Búgin L. N. Gýmılev atyndaǵy Eýrazııa ulttyq ýnıversıtetiniń stýdentterimen kezdesý ótti.
Volonterge qandaı talap qoıylady
«Eriktilerge qoıylatyn negizgi krıterııler: jasy 18-den asýy, qoǵamdyq jumystarǵa belsendi qatysýy, birneshe til bilýi, ulttyq sporttan nemese ulttyq mádenıetimizden habardar bolyp, kóshpendiler oıyndaryna shyn nıetimen úles qosýǵa yntasy bolýy kerek. 18-ge tolmaǵan, birneshe til biletin, jan-jaqty mektep oqýshylary da usynys jiberip jatyr. Biz ol usynystardy jeke-jeke qarastyramyz, olardyń ata-analarynan ruqsat alý kerek bolady. Basqa óńirlerden de talantty jastar habarlassa, mindetti túrde árbirin jeke qarastyryp, sheshim qabyldaımyz», - deıdi V Dúnıejúzilik kóshpendiler oıyndaryn daıyndaý jáne ótkizý dırektsııasy basshysynyń orynbasary Abylaı Qondybaev.
Spıkerdiń aıtýynsha, Qyrǵyzstannan, Reseıden, Eýropa elderindegi volonterlerden de usynys túsýde. Sheteldik volonterler de qabyldanady, biraq asa kóp bolmaıdy. Biraq volonterlerdiń negizgi kontıngenti Astana qalasynan bolǵany abzal.
Jalpy kóshpendiler oıyndaryna 1000 erikti iriktelip alynady dep josparlanǵan. Saýalnamany elordalyq oqý oryndarynda nemese worldnomadgames.kz/ saıtynda onlaın toltyryp, uıymdastyrýshylardan keri baılanys kútý qajet. Saýalnamada úmitker jeke málimetterin, volonterlik tájirıbesin, kıim ólshemin, tilderdi bilý deńgeıin, qyzyǵýshylyqtary men daǵdylaryn jazý kerek.
Ýnıversıtet bazalarynda nemese dırektsııa keńsesinde árbir úmitkermen suhbat júrgiziledi. Suhbat kezinde úmitkerdiń qabiletteri men beıini anyqtalady. Іrikteý men ótinim qabyldaý maýsym aıyna deıin jalǵasady. Іrikteýdiń eń sońǵy kezeńi – árbir eriktimen kelisimshartqa qol qoıý bolmaq.
Volonterler qandaı jumyspen aınalysady
Kóshpendiler oıyndarynda volonterler aýdarmashy, delegattardy alyp júrý, saltanatty rásimder jáne protokol, baspasóz ortalyǵy, sporttyq saıystar, tasymaldaý, ornalastyrý jáne tamaqtandyrý, kútip alý jáne shyǵaryp salý sekildi fýnktsıonaldyq baǵyttar boıynsha bólinedi. Ár volonterdiń jumys kúni 6-8 saǵattan aspaıdy.
«JOO basshylyǵyna hat joldap, oıyndar kezinde volonterdi sabaqtan bosatýdy suraımyz. Biraq eriktiniń ózi jiberip alǵan sabaqtaryn keıin qosymsha oqyp, baǵdarlamany qýyp jetýi kerek. Tórt myń sportshydan bólek, Astanaǵa 100 myńnan astam týrıst keledi dep boljanyp otyr. Olarmen ákimdik jumys isteıdi, óz volonterlaryn shaqyrady. Bizdiń eriktiler tek qana oıynǵa keletin qonaqtarǵa kómek kórsetetin bolady. Ár volonter grafıgi óziniń fýnktsıonaldy baǵytyna baılanysty bolady. Mysaly, kútip alý men shyǵaryp salý jumystary bolsa, túngi ýaqyttaǵy reısterge shyǵýy kerek bolady», - dep túsindirdi Abylaı Qondybaev.
Bul rette árbir volonter kıim-keshekpen, tolyqqandy tamaqpen, baılanyspen, kólikpen qamtylady.
Volonter bolý nelikten mańyzdy
Spıkerdiń aıtýynsha, Kóshpendiler oıyndarynyń volonterine esh aqy tólenbeıdi, biraq baǵaly marapattar men túrli múmkindikter joly ashylady.
«Oıyndarǵa atsalysqan árbir volonterge halyqaralyq sertıfıkat beriledi. Bul sheteldik bedeldi oqý oryndaryna nemese taǵylymdamaǵa qujat tapsyrarda úlken artyqshylyq beredi. Іs-shara aıaqtalǵan soń, ózin jaqsy qyrynan kórsetken eriktiler men koordınatorlarǵa alǵys hattar men baǵaly syılyqtar beriledi. Barlyq eriktilerdi oıyn kúnderi ótetin mádenı-is sharalarǵa akkredıtteımiz, olardy tegin tamashalaý múmkindigi bolady. Bir apta boıy qoǵamdyq kólikte tegin júre alady. Ózge qalalardan keletin volonterlerdi jatyn ornymen qamtý máselesin pysyqtap jatyrmyz», - dedi A. Qondybaev.
Sonymen birge, irikteý kezeńinen ótken myń volonterge arnaıy oqytý-daıyndaý jumystary júrgiziledi. Olar sheteldik qonaqtardy kútip alý, alyp júrý, komandada jumys isteý boıynsha trenıngterge qatysady.
«Halyqaralyq jarysta erikti bolý mol tájirıbe beredi jáne úlken ómirlik mektep bolady. Jańa adamdarmen tanysyp, jańa dostar tabýǵa bolady. Іrikteýge ótinim beretin jastyń eń birinshi maqsaty osy bolýy kerek dep oılaımyn», - dedi dırektsııa ókili.
Aıta keteıik, Dúnıejúzilik Kóshpendiler oıyndary – etnıkalyq, dástúrli sport túrleri boıynsha eki jyl saıyn ótetin halyqaralyq jarys. 2014, 2016 jáne 2018 jyldary alǵashqy oıyndar Qyrǵyzstannyń Sholpan Ata qalasynda ótken edi. 2022 jyly Túrkııanyń Iznık shaharynda tórtinshi Dúnıejúzilik oıyndar uıymdastyryldy. 2024 jyly Qazaqstan astanasy sportshylardy qabyldaıdy.
Besinshi kóshpendiler oıynynda sporttyń 20 túrinen jarys jáne 10 kórneki sport saıysyn ótkizý josparlanǵan. Olardyń qatarynda at jarysy, ulttyq kúres túrleri, dástúrli ıntellektýaldyq oıyndar, jekpe-jek túrleri boıynsha, dástúrli sadaq atý, saıatshylyq óneri, halyq oıyndary, sondaı-aq etnıkalyq sport túrlerinen kórsetilim qoıylymdary bar.
Uıymdastyrýshylar artyq shyǵynǵa jol bermeý men tıimdilik ustanymdaryna súıenedi. Oıyndardy ótkizý úshin jańa ǵımarattar salynbaı, qolda bar sport qurylymdary tartylady. Qazirgi ýaqytta «Qazanat» ıppodromynda rekonstrýktsııa, «Astana Arena» stadıony men «Alaý» muz saraıynda jóndeý jumystary bastalyp ketti. Qaıta jańartý jumystarynan keıin «Qazanat» ıppodromy – bir ýaqytta 10 myń kórermendi qabyldaı alady.