Astanada dúnıejúzilik taý-ken kongresi ótedi

ASTANA. QazAqparat - Osy jyldyń 19-22 maýsymynda Astana qalasynda 25-shi Dúnıejúzilik taý-ken kongresi (DTK) ótedi. Bul qatty paıdaly qazbalar ken oryndaryn ıgerý, ǵylym jáne tehnıka, sondaı-aq qorshaǵan ortany qorǵaý jáne ónerkásiptik qaýipsizdik salasynda jumys isteıtin álemniń 50 eliniń iskerlik orta kásipqoılary men ǵalymdaryn biriktirýge baǵyttalǵan eń aýqymdy jáne mańyzdy salalyq is-sharalardyń biri, dep habarlaıdy Astana qalasy ákimdiginiń resmı saıty.

Kongress «Innovatsııalyq basymdyq - álemdik taý-ken ónerkásibiniń ósý jolynda jasalǵan qadam» taqyrybynda ótedi jáne geologııalyq barlaý, óndirý jáne baıytý, táýekelderdi baǵalaý, salany tsıfrlandyrý, jańa tehnologııalardy engizý, halyqaralyq qarjylandyrýdy tartý jáne t.b. máselelerdi qamtıdy.

Qazirdiń ózinde quramynda Avstralııa, Avstrııa, Kanada, Polsha, Norvegııa jáne Frantsııadan delegatsııalar, álemniń ǵylymı jáne isker qoǵamdastyqtarynyń jetekshi sarapshylary, ınvestorlar men qarjy ınstıtýttary, sondaı-aq Úkimet basshylary bar 46 el, 56 profıldik qaýymdastyq, 41 ýnıversıtet ózderiniń qatysýyn rastaǵan.