Astanada Dúnıejúzilik saýda ortalyǵynyń ǵımaraty salynady

ASTANA. QazAqparat - Astanada Dúnıejúzilik saýda ortalyqtarynyń qaýymdastyǵy Halyqaralyq saýda ortalyǵyn salatyn bolady, dep habarlaıdy elorda ákimdiginiń resmı saıty Aqordaǵa silteme jasap.

Elbasymen kezdesýge Halyqaralyq saýda ortalyqtary qaýymdastyǵynyń basqarma múshesi (WTCA) Rolf Draak jáne «Nest Investments HOLDINGS» kompanııasynyń korporatıvtik ınvestıtsııalar jónindegi dırektory Mehran Eftehar jáne Prezıdent Ákimshiliginiń basshysy Á. Isekeshev, Astana qalasynyń ákimi B. Sultanov jáne sáýletshi-dızaıner Kennet Brıýs Djeıms Anderson qatysty.

Memleket basshysyna elordada sheteldik ınvestıtsııalardyń esebinen boı kóteretin Dúnıejúzilik saýda ortalyǵynyń ǵımaraty qurylysy jobasy usynyldy.

Negizgi ınvestor - saýdany damytý ortalyqtarynyń dúnıejúzilik qaýymdastyǵy. Ár túrli elderde halyqaralyq saýdanyń ortalyqtary transulttyq kompanııalardyń aımaqtyq shtab páterlerin ornatýǵa arnalǵan bıznes alańǵa aınalýda.

Nursultan Nazarbaev jańa nysan jobasyn maquldap, Astana qalasynyń ákimi B. Sultanovqa ınvestormen birlesip, jobany áske asyrý sharalaryn bastaýdy tapsyrdy.

Investorlardyń iri aýqymdy jobany iske asyrý boıynsha usynystary elorda ákimdiginde ótken kezdesý barysynda talqylandy.

«Memleket basshysy bizdiń aldymyzǵa qalany basqarýdyń jańa modelin qurý mindetin qoıdy. Ol kreatıvti ıdeıaly adamdardy tartýǵa, kóliktik-logıstıkalyq, qarjylyq habqa qolaıly jaǵdaı týdyrýǵa negizdeledi. Osy tapsyrmalar ákimdiktiń qalany 2050 jylǵa deıingi damytýǵa baǵyttalǵan strategııanyń basty negizi bolýy tıis. Ony ázirleý barysynda biz álemdik astanalar men iri qalalardyń tájirıbesin taldap jatyrmyz.  Biz aldymyzǵa Astanany álemdik astanalar qataryna kirgizý úshin naqty baǵytty aıqyndap alýymyz kerek. Bul qazirgi zamanǵy jáne bolashaq tehnologııalar jaıly, qalalyq, sáýlet, ýrbanıstik sheshimderge qatysty aıtylyp otyr. Sizder men bizdiń birlesken jumys - bolashaqta iske asatyn iri jobalardyń biri. Sol sebepti de bolashaq  Dúnıejúzilik saýda ortalyǵynyń jańa ǵımaraty úshin EKSPO aýmaǵynda taińdaıǵa týra keledi. Ol jerde «Astana» halyqaralyq qarjy ortalyǵy da ornalasqan»,- dedi Baqyt Sultanov.

Investorlar búgingi tańda Qazaqstan bıznesti júrgizý úshin beriletin múmkindikterge óziniń joǵary baǵasyn berdi.

Aıta keteıik, Halyqaralyq saýda ortalyqtary álemniń 100 elindegi 300-den astam ortalyqtan turatyn aýqymdy jahandyq jeli bolyp tabylady. Halyqaralyq saýda ortalyqtarynyń qaýymdastyǵy - BUU Ekonomıkalyq jáne áleýmettik keńesi janyndaǵy úkimettik emes uıym.

Halyqaralyq saýda ortalyqtarynyń kóp bóligi Eýropa (100-den astam) men AQSh-ta (60-qa jýyq) ornalasqan.

HSO barlyǵy kommertsııalyq aqparat, iskerlik keńester, kórmelerdi. Konferentsııalar men semınarlardy uıymdastyrý,keńselerdi jalǵa berý, qonaq úı qyzmetteri, baılanys jáne kommertsııalyq oqytý, rekreatsııalyq jáne kóńil kóterý qyzmetteri sııaqty qyzmetterdiń standartty jıyntyǵyn usynady. Óz qyzmetin júzege asyra otyryp, HSO aımaqtyq erekshelikterdi, óńirdiń múddelerin esepke alady. Máselen, Mehıko HSO, San-Paýlı HSO jáne Rotterdam HSO jalǵa alýshylarǵa túrli qyzmetterdi usynady. Kórmeler men jármeńkeler - bul Taıbeı HSO, BazelHSO jáne Halıfaks HSO ereksheligi. Aqparattyq qyzmetterdi kórsetýde Baltımor HSO, Grenobl HSO jáne Seýl HSO tájirıbesi mol. Saýda mıssııalarynyń uıymy kóbine Parıj jáne Sapporo HSO-tarynda suranysqa ıe.

Dýbaıdaǵy HSO (Dýbaı DSO) sondaı-aq, turǵyn úı apartamentteri men kórmelik saýda zaldary bar bıznes ortalyq bolyp tabylady. Bul oryn el aýmaǵyndaǵy halyqaralyq saýdanyń damýyna óziniń zor úlesin qosty. Qazir munda kóptegen konferentsııalar, kórmeler, shoý-baǵdarlamalar, banketter ótkiziledi.