Astanada Dúnıejúzilik qorshaǵan ortany qorǵaý kúnine oraı 100-den astam kóshet otyrǵyzyldy (FOTO)

ASTANA. QazAqparat - Búgin Astanada Dúnıejúzilik qorshaǵan ortany qorǵaý kúnine oraı dástúrli ekologııalyq aktsııa ótkizildi. Aktsııa aıasynda Qabanbaı batyr dańǵylynyń boıynda QR Energetıka mınıstrliginiń jáne elorda ákimdiginiń ókilderi 100-den astam kóshet otyrǵyzdy, dep habarlaıdy astana.kz.

- Atalmysh sharanyń basty maqsaty álemdik qaýymdastyqtyń, ekologtardyń nazaryn qorshaǵan ortany qorǵaý máselelerine aýdarý bolyp tabylady. Biz bolashaq urpaqqa tumsa tabıǵatty buzylmaǵan kúıinde jetkizýimiz kerek. Elorda turǵyndary, barsha qazaqstandyqtar jáne álem halyqtary mundaı sharalarǵa belsene atsalysýy tıis dep sanaımyn, - dedi QR Energetıka mınıstriniń orynbasary Talǵat Ahsambıev. Sonymen qatar búgin QR Energetıka mınıstrliginiń, Astana qalasynyń Ekologııa departamenti, Tabıǵı resýrstar jáne tabıǵat paıdalanýdy retteý basqarmasynyń qyzmetkerleri jáne eriktiler Qarasý ózeniniń arnasyn tazartý boıynsha sanıtarlyq jumystar júrgizdi. Jalpy, sharaǵa 500-ge jýyq adam qatysyp, elordany kógaldandyrýǵa óz úlesterin qosty. Búkilálemdik qorshaǵan ortany qorǵaý kúni aıasynda Astanada «Gúldengen qala - bolashaq urpaqqa amanat» aktsııasy ótkizilmek. Shara sheńberinde qalany abattandyrý, sanıtarlyq tazartý baǵytynda birqatar jumystar atqarylady. Eske sala keteıik, Dúnıejúzilik qorshaǵan ortany qorǵaý kúni BUU Bas assambleıasynyń sheshimimen 1972 jyly bekitilgen.