Astanada drama teatrlardyń respýblıkalyq festıvali bastaldy
Bıyl teatr festıvali kórnekti teatr jáne kıno aktrısasy, Qazaqstannyń memlekettik syılyǵynyń laýreaty, KSRO halyq ártisi Sholpan Jandarbekovanyń 100 jyldyq mereıtoıyna arnalyp otyr.
«Sholpan Jandarbekova ulttyq teatr jáne kıno óneri tarıhynda óshpes iz qaldyrǵan erekshe tulǵa. «Abaı joly», «Dala úni», «Mahabbat týraly poema» jáne basqa da fılmderde oınaǵan. Sondaı-aq teatr sahnasynda 200-den astam obrazdy somdaǵan ártis. T. Júrgenov atyndaǵy óner akademııasynda ustazdyq etip, ártisterdiń alyp shoǵyryn tárbıelep shyǵardy», - dedi QR Mádenıet jáne sport mınıstri Dáýren Abaev festıvaldiń ashylý saltanatynda.
Búgin bastalǵan festıvalge el óńirlerinen 10 drama teatr qatysyp jatyr. M ádenı shara 23 qazanǵa deıin jalǵasady.
«Búgingi festıval elimizdegi eń aýqymdy mádenı jobalardyń biri. Talaı talantqa tuǵyr bolǵan osynaý teatr jármeńkesin kórermender asyǵa kútedi. Jas rejısserler men akterler kásibı shyńdalyp, al aǵa býyn óz tájirıbesin ortaǵa salatyn festıval. Barlyq qatysýshylarǵa sáttilik tileımin. Shyǵarmashylyqty shyńdap, oı, tájirıbe almasatyn aıtýly teatr festıvali merekesin ashyq dep jarııalaımyn. Súıikti kórermendi sahna sıqyryna bóleı berińizder», - dedi mınıstr.
Sondaı-aq atalǵan shara aıasynda Sholpan Jandarbekovanyń shyǵarmashylyǵyna arnalǵan dóńgelek ústel otyrysy uıymdastyrylyp, óner juldyzynyń ómirinen syr shertetin Erǵazy Tóleýdiń «Sholpan juldyz» atty kitabynyń tusaýkeseri ótti.
Saltanatty kesh sońynda jınalǵan qaýym Q. Qýanyshbaev atyndaǵy memlekettik akademııalyq qazaq mýzykalyq drama teatrynyń «Altaıdan aýǵan el» atty qoıylymyn tamashalady.