Astanada dızaın-kodtyń buzylýyna baılanysty 1200-den astam jarnamalyq belgi alynyp tastaldy

ASTANA. QazAqparat - Astanada 2019 jyly bekitilgen qalanyń dızaın-kodyna sáıkes syrtqy jarnama men mańdaıshalardy retke keltirý boıynsha belsendi jumys júrip jatyr, dep habarlaıdy QazAqparat qalalyq ákimdiktiń resmı saıtyna silteme jasap.

Qazirgi ýaqytta bekitilgen dızaın kodqa sáıkes kelmeıtin 1200-den astam jarnamalyq element bólshekteldi. Mundaı buzýshylyqtardy joıý úshin shaǵyn jáne orta bıznes ıelerine syrtqy jarnamany sáıkestendirý týraly habarlamalar jiberiledi. Bul jumys qalanyń barlyq aýdanynda júrgiziledi.

Astana qalasynyń Ýrbanıstıka ortalyǵy mańdaıshalar boıynsha 400 eskızdik usynys pen usynym ázirledi. Qalalyq Ýrbanıstıka ortalyǵynda kelisilmegen syrtqy jarnama vızýaldy shý shyǵaratynyn, qalanyń jalpy kórinisi men úıdiń kelbetin buzatynyn atap ótti. Maqsat – syrtqy jarnamany retke keltirý, birtutas jáne tartymdy qalalyq ortany qurý.

Mysaly, qazirgi ýaqytta «Lazýrnyı kvartal», «Trıýmfalnyı turǵyn úı keshenderi, sondaı-aq Sátbaev, Túrkistan kósheleriniń, Máńgilik el, Respýblıka dańǵyldarynyń jáne t.b. boıynda ornalasqan turǵyn úı keshenderi boıynsha jumys júrgizilip jatyr.

Jarnamalyq belgilerdiń sáıkes kelmeýi boıynsha usynystardy elordanyń Ýrbanıstıka ortalyǵynyń poshtasyna jiberýge bolady: [e-mail].