Astanada demalys kúnderi Indonezııanyń jazǵy festıvali ótedi
Atalǵan festıval alǵash ret Indonezııa men Qazaqstan arasyndaǵy dıplomatııalyq qatynastardyń ornaǵanyna 30 jyl tolýyna oraı uıymdastyryldy. Ol demalys kúnderi elordadaǵy Indonezııa mádenı ortalyǵynda (Saraıshyq, 14) saǵat 17:00-22:00 aralyǵynda ótedi.
Ashylý saltanatynda Indonezııanyń Qazaqstandaǵy Elshisi Mohamad Fadjrýl Rahman Syrtqy ister mınıstriniń orynbasaryna, elorda ákiminiń orynbasaryna, QMDB tóraǵasynyń orynbasaryna, sondaı-aq búgingi keshtiń barlyq qonaqtaryna alǵysyn bildirdi.
«Bizdiń mádenı ortalyqqa qosh keldińizder! Mádenı dıplomatııa aıasynda búgingi shara Indonezııa men Qazaqstan arasyndaǵy ekijaqty mádenı dıalogty nyǵaıtady. Eki el jastary bı qoıylymdary men ánder shyrqaıdy. Bul festıval Bilim berý dıplomatııasyn damytýǵa da baǵyttalǵan. Sondyqtan jaqyn arada Indonezııa óner ýnıversıteti men Qazaq ulttyq horeografııa akademııasy arasynda memorandýmǵa qol qoıylady. Sondaı-aq, Indonezııadan kelgen stýdentterge bólingen 26 grant úshin Qazaqstan Úkimetine alǵys aıtqymyz keledi. Búgingi tańda olar Qazaqstannyń iri joǵary oqý oryndarynda oqýda. Bizdiń festıval ekonomıka men dıplomatııany ilgeriletýge, odan ári baıytýǵa baǵyttalǵan. Sondyqtan bul kórmede siz sapaly ónimniń júzden astam túrimen tanysa alasyz: bul ulttyq taǵamdar, halyqtyq áshekeıler, kıim-keshek jáne kádesyılar», - dep atap ótti dıplomat.
Mohamad Fadjrýl Rahman 1,5 jyldan beri Qazaqstanda elshi bolyp jumys isteıdi.
«Men jergilikti halyqtyń qonaqjaılylyǵy men meıirimdiligine tánti boldym. Sizderdiń ulttyq taǵamdaryńyz, ásirese qazaqsha et erekshe unaıdy», - deıdi elshi.
Sonymen birge, festıvalge kelýshiler ındonezııalyq fılmderdi tamashalaı alady. Keshti qyzyqty etý úshin qonaqtar bı jarystaryna, Indonezııa týraly vıktorınalarǵa qatysyp, estelik kádesyı alý múmkindigi bar.
Aıta keteıik, Indonezııa Respýblıkasy 1945 jyly 17 tamyzda táýelsizdigin alǵan. Memleket ataýy «Araldaǵy Úndistan» degen maǵynany bildiredi. Onda 270 mln astam adam turady, halyq sany boıynsha Qytaı, Úndistan, AQSh-tan keıin 4-orynda tur. Tıisinshe, álemde musylmandar sany eń kóp memleket bolyp sanalady.
Indonezııa eń úlken aral-memleket retinde de tanymal. Memlekette 17 myńnan astam aral bar. Oǵan qosa, Indonezııada janartaýlar, lava tasý qaýpi óte joǵary.
Indonezııa astanasy Djakarta qalasyn sý basý qaýpi kóbeıgendikten, 2014 jyly el astanasyn aýystyrý sheshimi qabyldanǵan. Ol úshin Kalımantan aralynda Nýsantara qalasy jańadan salynyp jatyr.
Sonymen birge, Indonezııa Balı, ıAva, Sýmatra sekildi týrıstik araldarymen óte tanymal.