Astanada DDU-nyń Eýropalyq komıtetiniń 73-sessııasy ótedi – Májilis zań qabyldady

<p>Búgin Májilistiń jalpy otyrysynda &laquo;Qazaqstan Úkimeti men Dúnıejúzilik densaýlyq saqtaý uıymy arasyndaǵy Astanada (Qazaqstan Respýblıkasy) DDU-nyń Eýropalyq óńirlik komıtetiniń jetpis úshinshi sessııasyn uıymdastyrý týraly kelisimdi ratıfıkatsııalaý týraly&raquo; Zańy qabyldandy, dep habarlaıdy <a href="Kazinform" target="_blank" rel="noopener">Kazinform.</a></p>

Kelisim Qazaqstan Respýblıkasynda Dúnıejúzilik densaýlyq saqtaý uıymynyń Eýropalyq óńirlik komıtetiniń 73-sessııasyn (DDU EÓK sessııasy) ótkizýge baǵyttalǵan. Qujatqa sáıkes Qazaqstan jaǵynyń mindettemelerinde 2023 jylǵy 24-26 qazan aralyǵynda Astana qalasynda DDU EÓK jetpis úshinshi sessııasyn ótkizýdi uıymdastyrý eskerilgen. Kelisimge 2023 jylǵy 23 mamyrda Jenevada qol qoıyldy.

«Qaralyp otyrǵan zań jobasy Qazaqstanda alǵash ret densaýlyq saqtaý salasyndaǵy joǵary deńgeıdegi saıası ári áleýmettik is-sharany ótkizýge múmkindik beredi. Eýropa óńiriniń 53 eli qatysatyn DDU-nyń Eýropalyq óńirlik komıtetiniń jıyny jylyna bir ret ótkiziledi. Onda densaýlyq saqtaý júıesin damytýdyń jahandyq máseleleri talqylanady, densaýlyq saqtaý júıesin damytý jónindegi óńirlik josparlar, qararlar, sheshimder qabyldanady. Sonymen qatar, taıaý kúnderi DDU-men birlesip, DDU bas dırektory T.Gebreıesýstyń qatysýymen Medıtsınalyq-sanıtarlyq alǵashqy kómek boıynsha Almaty deklaratsııasynyń 45 jyldyǵy men Astana deklaratsııasynyń 5 jyldyǵyna arnalǵan Jahandyq konferentsııa ótedi. Astana osy kúnderi jahandyq densaýlyq saqtaý ortalyǵyna aınalady. Bul is-sharalarǵa 81 elden 650 delegat qatysady», - dedi Densaýlyq saqtaý mınıstri Ajar Ǵınııat.

DDU Eýropalyq óńirlik komıtetiniń 73-shi sessııasynyń aıasynda densaýlyq saqtaýdyń birneshe jospary qaralady jáne usynylady. Olar mynany qamtıdy:

- 2023-2028 jyldarǵa arnalǵan densaýlyq saqtaý qyzmetkerlerine qatysty is-qımyldyń negizgi baǵdarlamasy;
- 2023-2030 jyldarǵa arnalǵan bosqyndar men mıgranttardyń densaýlyǵyn saqtaý jónindegi is-qımyl jospary.

«Sonymen qatar, sessııa barysynda delegattarǵa DDU Eýropalyq óńirlik bıýrosynyń 2022-2023 jyldarǵa arnalǵan qyzmeti týraly esep, óńirdegi densaýlyq saqtaý salasyndaǵy tótenshe jaǵdaılar týraly jańartylǵan aqparat, sondaı-aq «Kezek kúttirmeıtin medıtsınalyq kómek brıgadasy» bastamasyn nyǵaıtý jónindegi óńirlik is-qımyl jospary usynylady. Bul taqyryptar qazirgi álem tap bolǵan jahandyq daǵdarystardy eskere otyryp shyǵaryldy. Nátıjeleri boıynsha Eýropalyq DDU-nyń barlyq elderiniń oryndaýy úshin mindetti bolatyn qarar qabyldanady. Osy is-sharalardy ótkizý memlekettiń densaýlyq saqtaý salasyndaǵy bastamalaryn ilgeriletedi, Qazaqstannyń densaýlyq saqtaý júıesiniń tabystaryn belgili eýropalyq memleketterdiń arasynda kórsetýge múmkindik beredi, densaýlyq saqtaý salasyndaǵy joǵary deńgeıdegi mańyzdy óńirlik saıası jáne dıplomatııalyq is-sharany qabyldaýǵa qabiletti el retinde qosymsha oń kórinis beredi», - dedi mınıstr.