Astanada dástúrli «KazChess Awards» syılyǵy tabystaldy

<p>ASTANA. KAZINFORM &ndash; Elordada dástúrli &laquo;KazChess Awards&raquo; syılyǵy tabystaldy. Bıyl qatarynan ekinshi jyl atalǵan júldemen úzdik sportshylar, jattyqtyrýshylar, tóreshiler jáne Qazaqstanda shahmat sportynyń damýyna súbeli úles qosyp júrgen azamattar marapattaldy.</p>

QR Týrızm jáne Sport mınıstrligi málim etkendeı, bıyl nomınatsııalar tizimi 12 sanatqa deıin keńeıtildi, ótken jyly 9 nomınatsııa bolǵan.

Saltanatty is-sharaǵa Týrızm jáne sport mınıstri Ermek Marjyqpaev, Qazaqstan shahmat federatsııasynyń prezıdenti Tımýr Týrlov, sondaı-aq tanymal sportshylar, eńbek sińirgen jattyqtyrýshylar jáne ózge de tulǵalar qatysty.

Foto: Sportty damytý dırektsııasy

Marapattaý rásiminde Týrızm jáne sport mınıstri Ermek Marjyqpaev quttyqtaý sóz sóılep, keıingi jyldary elimizde shahmat sporty qarqyndy damyp kele jatqanyn atap ótti. Qazirgi tańda respýblıka boıynsha 7 myń sektsııa jumys isteıdi, onda 200 myńnan astam adam aınalysady.

«Eń aldymen osy is-sharanyń mańyzdylyǵyn atap ótkim keledi. Bul marapat sportshylardyń eldegi shahmatty damytýdaǵy eńbegin baǵalaý maqsatynda uıymdastyrylǵan jáne respýblıkalyq, halyqaralyq deńgeıde sporttyń osy túrin odan ári tanymal etýge, sportshylardyń kásibı sheberligi men básekege qabilettiligin arttyrýǵa yqpal etedi. Memleket basshysy elimizdegi shahmatty qoldaý men damytýǵa erekshe kóńil bóledi. Osy bastamanyń arqasynda respýblıkada shahmatty damytýdyń 2023-2027 jyldarǵa arnalǵan keshendi jospary bekitildi», - dedi Ermek Marjyqpaev.

Jeńimpazdar Qazaqstan shahmat federatsııasy prezıdıým músheleriniń daýys berý jolymen tańdaldy. Jeńimpazdardy anyqtaý kezinde sportshylardyń halyqaralyq jáne respýblıkalyq jarystardaǵy jeke kórsetkishteri eskerildi.

«Erler arasynda úzdik sportshy» atalymy – Aldııar Ańsat,
«Áıelder arasynda úzdik sportshy» atalymy – Ksenııa Balabaeva,
«Jyl úmiti» atalymy – Danıs Qýandyquly,
«Jyl bapkeri» atalymy – Aleksandr Moıseenko,
«Órleý – 2024» atalymy – Zarına Nurǵalıeva,
«Úzdik tóreshi» atalymy – Káýsar Baýyrjan,
«Erler arasynda úzdik ardager» atalymy – Aıtqazy Baımurzın,
«Áıelder arasynda úzdik ardager» atalymy – Irına Býlanova,
«Jyldyń úzdik partııasy» atalymy – Álisher Súleımenov,
«Úzdik shahmat sholýshysy» atalymy – Aleksandr Lıahov,
BAQ arasynda jyl seriktesi – Kýrsıv,
«Úzdik komanda» atalymy – QR ulttyq áıelder quramasy.

Foto: Sportty damytý dırektsııasy

Aıta ketý kerek, sporttyń osy túrin damytýǵa baǵyttalǵan «Mekteptegi shahmat» jobasy aıasynda búginde 983 mektepte zııatkerlik oıyn sabaqtary ótkiziledi. Onyń ishinde 110 mektepte mindetti pán retinde oqytylady. Sondaı-aq 2023 jyly 2 myńnan astam qatysýshyny qamtyǵan áýesqoılar arasynda shahmatty nasıhattaýǵa baǵyttalǵan «Shahmat kerýeni» respýblıkalyq jobasy iske asyryldy.