Astanada dáriger Ivan Lıge memorıaldyq taqta ornatyldy

ASTANA. QazAqparat – Astanada №2 qalalyq kópsalaly aýrýhananyń burynǵy basshysy Ivan Lıdi eske alý is-sharasy ótti. Onyń qurmetine medıtsınalyq mekeme ǵımaratynyń qasbetine memorıaldyq taqta ornatyldy, dep habarlaıdy QazAqparat elorda ákimdiginiń resmı saıtyna silteme jasap.

«Ivan Ivanovıch ómirden ótkende biz úlken aǵamyzdan, qurmetti adamnan aıyryldyq», - dedi Astana ákiminiń orynbasary Erlan Bekmurzaev.

Ivan Lı elordalyq aýrýhanany 2016 jyldyń sáýirinen bastap basqardy. Pandemııa ýaqytynda №2 qalalyq kópsalaly aýrýhana alǵashqylardyń biri bolyp KVI-men kúresýdiń úlken júktemesin qabyldady. Aýrýhananyń bas dárigeri Ivan Lıdiń basshylyǵymen COVID-19 boıynsha alǵashqy mobıldi taldaý pýnktteri ashyldy. Ol patsıentterdi ózi qabyldap, tekserýden ótkizdi. Koronavırýspen kúrestiń bel ortasynda 2020 jyldyń 25 shildesi kúni 60 jasynda Ivan Ivanovıch Lı qaıtys boldy.

«Biz uzaq ýaqyt birge qyzmettes boldyq, onyń kóptegen tyń ıdeıalary bar edi. Bárin sońyna deıin jetkizemiz dep úmittenemin. Bir kezderi ol aýrýhananyń deńgeıin joǵary kúıge keltirgen. Menińshe, ol óziniń bastamalary jalǵasyp, tıisti deńgeıde damyp jatqanyna qýanar edi. Qurmetti áriptes, óz isiniń kásibı mamany, altyn adam Ivan Ivanovıch árqashan adamzatqa, óz kásibine degen adaldyqtyń úlgisi bolǵan jáne bolyp qala beredi», - dep atap ótti Astana qalasy Qoǵamdyq densaýlyq saqtaý basqarmasynyń basshysy Tımýr Muratov.

Ivan Lı 2018 jyly Astananyń medıtsınalyq uıymdary arasynda densaýlyq saqtaý salasynyń eń tıimdi menedjeri retinde «Altyn Shıpager» medıtsınalyq syılyǵyn aldy. «Qurmet» ordenimen (2013 jyl), «Densaýlyq saqtaý isine qosqan úlesi úshin» tósbelgisimen, «Qazaqstan Respýblıkasynyń táýelsizdigine 20 jyl» medalimen marapattalǵan. 2020 jyldyń maýsym aıynda Prezıdent Jarlyǵymen azamattardyń densaýlyǵyn saqtaý boıynsha qajyrly eńbegi úshin «Parasat» ordenimen marapattaldy.