Astanada dáriger mamandar jetkilikti – basqarma basshysy

<p>ASTANA. KAZINFORM &ndash; Densaýlyq saqtaý basqarmasynyń basshysy Álııa Rústemovanyń aıtýynsha, elordada vedomstvolyq baǵynysty mekemelerde dárigerlik kadrlardyń tapshylyǵy joq. Vedomstvo basshysy jaǵdaı burynǵydaı kúrdeli emes dep málimdedi. Qazir vedomstvolyq baǵynysty medıtsınalyq uıymdarda 12 myńǵa jýyq medıtsına qyzmetkeri jumys isteıdi, onyń ishinde 3,5 myń dáriger bar.</p>

«Qazirgi ýaqytta 83 dáriger mamany tapshy. Bul – negizinen ýchaskelik dárigerler. Kadrlardyń aýysýy ártúrli sebeptermen júredi. Mysaly, jas maman-áıelder otbasyn quryp, dekrettik demalysqa ketedi, taǵy biri basqa mamandyqtarǵa qaıta daıarlanyp, baǵytyn ózgertedi, keıbir dárigerler ártúrli jaǵdaılarda basqa qalalarǵa, elderge kóshedi, osylaısha dáriger kadrlarynyń jetispeýshiligi qalyptasady. Árıne, basty sebepterdiń biri – fızıkalyq jáne psıhoemotsıonaldy joǵary jumys», - dedi spıker.

Rústemova medıtsına qyzmetkerleri úshin halyqpen jumys isteý qıyndaı túskenin aıtyp ótti.

Foto: Densaýlyq saqtaý basqarmasy

«Keıbir azamattardyń jıi agressıvti minez-qulqy, medıtsına qyzmetkerlerine qatysty qoqan-loqqylar men qorlaý bizdiń mamandardy jumys oryndaryn ózgertýge májbúr etedi. Qarapaıym ǵana qurmet kórsetilmeıtin jerde kim jumys istegisi keledi!? Biz qyzmetkerlerimizge barlyq jaǵynan qoldaý kórsetemiz, olarǵa jumys isteý úshin tıisti jaǵdaılar jasaýǵa tyrysamyz jáne jasaımyz, memlekettiń arqasynda medıtsına qyzmetkerleriniń jalaqysy qaıta qaralyp, artyp keledi. Ótken jyly dárigerlerdiń jalaqysy 30%-ǵa, orta medıtsınalyq qyzmetkerlerdiń jalaqysy 20%-ǵa ósti. Alaıda, bul motıvatsııa da jetkiliksiz. Halyq ta densaýlyq saqtaý salasynyń mamandaryna qamqorlyq jasaýy qajet. Bul jerde ortaq jaýapkershilik bolýy tıis», - dedi Álııa Rústemova.

Spıker atap ótkendeı, Densaýlyq saqtaý basqarmasy mamandardy jyl saıyn jaqyn jáne alys shetelderdiń jetekshi klınıkalarynda oqytady. Oǵan jergilikti bıýdjetten jyl saıyn shamamen 200 mln teńge bólinedi.

«Dárigerlerdiń qajettiligin qamtamasyz etý úshin, onyń ishinde jiti tapshy mamandyqtar boıynsha 2023 jyly jergilikti bıýdjet esebinen rezıdentýraǵa 131 grant bólindi. Sonymen qatar, ótken jyldary rezıdentýrany aıaqtap, vedomstvolyq baǵynysty uıymdarǵa 246 rezıdent jumysqa ornalastyryldy. Munyń bári elordalyq medıtsınalyq uıymdarda dárigerlik kadrlar boıynsha tapshylyqty is júzinde jabýǵa múmkindik berdi», - dedi Álııa Rústemova.