Astanada bir kúnde bes velosıpedti qoldy qylǵan jasóspirimder ustaldy

<p>ASTANA. KAZINFORM &ndash; Astanada bir kúnde bes velosıped urlap, satyp jibergen jasóspirimder anyqtaldy. Bul týraly Polisia.kz. jazdy.</p>

Almaty aýdany PB jedel ýákilderi jedel izdestirý is-sharalary barysynda velosıpedterdi urlap satýmen aınalysqan 14 jáne 15 jastaǵy kámeletke tolmaǵan eki balany anyqtady.

Qazirgi ýaqytta jasóspirimderdiń 5 velosıped urlaýǵa qatysy bar ekendigi belgili boldy.

«Ekeýi eki dóńgelekti kólikterdi bir aımaqta ornalasqan turǵyn úılerdiń kireberisteri men aýlalarynan erkin kirip alyp ketken. Sóıtip kúndizgi ýaqytta Petrov kóshesindegi úıdiń aýlasynan 90 myń teńge turatyn Petava velosıpedin urlap, izin sýytqan. Degenmen beınebaqylaý kameralarynyń kómegimen jas quqyq buzýshylardyń júrgen izi anyqtaldy. Qazirgi ýaqytta atalǵan fakti boıynsha qylmystyq is qozǵaldy», — delingen habarlamada. 

Kámeletke tolmaǵan jasóspirimdermen aldyn-alý áńgimeleri júrgizildi, zańdy ókilderine tapsyryldy. Urlanǵan bes velosıped tabylyp, tárkilendi.

Astana qalasy polıtsııa departamenti azamattarǵa qundy múlikterge qyraǵy bolýdy jáne qarapaıym qaýipsizdik erejelerin qatań saqtaýdy nazarǵa alýdy suraıdy. Sonymen qatar ata-analarǵa balalardyń tárbıesi men júrgen jerin baqylaýdy, olardy keshki ýaqytta jibermeýdi usynady.