Astanada Bozoq qalashyǵynyń 3D-modeli jasalady

ASTANA. QazAqparat - Astana qalasynyń ákimdigi Bozoq qalashyǵynyń 3D-modelin qurý jobasyn júzege asyrady. Bul týraly búgin elorda ákimi Baqyt Sultanov Elbasynyń «Uly dalanyń jeti qyry» atty maqalasyna arnalǵan is-sharada málim etti, dep habarlaıdy QazAqparat tilshisi.

«Memleket basshysy «Uly dalanyń jeti qyry» atty maqalasynda qazirgi býyn óziniń ulttyq tarıhyn qabyldap, túsiný kerektigin keńinen atap ótti. Jas qala bolǵanyna qaramastan, Astana Uly Jibek joly dástúriniń jandanǵan jarqyn úlgisi bolyp otyr. Astana saıyp kelgende tarıhı aýmaqta oryn tepken. Sebebi, dál osy jerde Bozoq qalashyǵynyń orny tabylǵanyn barshańyz bilesizder», - dedi shahar basshysy.

Baqyt Sultanovtyń aıtýynsha, ákimdik Bozoq qalashyǵynyń tarıhı mańyzyn tanytý baǵytynda jumysty ary qaraı jalǵastyratyn bolady.

«Biz tolyqqandy vırtýaldy shynaıylyq elementterimen birge Bozoq qalashyǵynyń 3D-modelin jasaýdy kózdep otyrmyz. Osylaısha, Ortalyq Qazaqstanda orta ǵasyrlarda ómir súrgen halyqtardyń mádenıetin, olar qaldyrǵan arheologııalyq muralardy pash etkimiz keledi. Bul baǵyttaǵy jumysymyz qyzyǵýshy kez kelgen adamǵa tarıhı muralarmen tanysýǵa múmkindik beredi», - deıdi ol.

Astana qalasynyń ákimdigi Mádenıet jáne sport mınıstrligimen birlese otyryp, 2020 jylǵa qaraı mádenı-tarıhı keshen qurý jumysyn aıaqtaıdy. Budan keıin Bozoq halyqaralyq deńgeıdegi ǵylymı-zertteý ári ǵylymı-ádistemelik ortalyqqa aınalady.

«Astana Eýrazııa kindiginde ornalasqan. Osynaý artyqshylyq - halyqaralyq qaýymdastyqtar moıyndaǵan bekem alańǵa, Shyǵys pen Batystyń arasyndaǵy kópirge aınalýyna múmkindik beredi», - dedi Baqyt Sultanov.