Astanada boı kóteretin «Jasyl kvartaldyń» tujyrymdamasyn ázirleýge halyqaralyq baıqaý jarııalandy

ASTANA. 25 aqpan. QazAqparat - Memleket basshysy N. Nazarbaevtyń tapsyrmasymen «Samuryq-Qazyna» ulttyq ál-aýqat qory» AQ-ǵa Astana qalasynda «Jasyl kvartal» qurylys jobasyn iske asyrý júkteldi.

Jobanyń operatory retinde «Samuryq-Qazyna» Jyljymaıtyn múlik qory» AQ belgilendi.

Osyǵan oraı, «Samuryq-Qazyna» jyljymaıtyn múlik qory» AQ Astana qalasyndaǵy «Jasyl kvartal» aýmaǵyn qala qurylysymen damytý tujyrymdamalaryn ázirleýge halyqaralyq konkýrs jarııalaıdy (sheberlik-josparlar, maketter, eskızder men aldyn ala tehnıkalyq-ekonomıkalyq negizdeme qosa berilýi tıis). Bul týraly kompanııanyń baspasóz qyzmetinen habarlady.

Baıqaýdyń maqsaty «Jasyl kvartal» tujyrymdamasyn aıqyndaý, eskızdik, sáýlettik jáne qurylys jobalaryn ázirleý jumysyna zamanaýı, biregeı, asa tartymdy dızaınerlik jáne qurylys ıdeıalaryn jáne sheshimderdi izdestirý bolyp tabylady.

Halyqaralyq baıqaý 2013 jylǵy 25 aqpannan bastap 5 sáýirge deıingi aralyqta ótkiziledi. Sharaǵa zańdy jáne jeke tulǵalar, avtorlar men avtorlyq ujymdar, jobalaý uıymdary, sondaı-aq sáýletshiler men jobalaýshylar qatysa alady.

Konkýrs tapsyrystaryn baǵalaý barysynda «Jasyl kvartal» aýmaǵyna balama energııa kózderi esebinen syrtqy jaryq berý, aǵashtar men sándik butalar arqyly kógaldandyrý, gúlzarlar, demalys oryndary, balalardyń oıyn alańqaılary, belsendi demalys oryndary sekildi tutastaı nysandar qamtylǵan jobalar nazarǵa alynady.

Jeńimpazdy aıqyndaýda tapsyrystyń halyqaralyq ekologııalyq jobalaý standarttaryna (LEED, BREEAM, DGNB) sáıkestigin qamtamasyz etetin tehnologııalardyń qoldanylýy da eskeriletin bolady. Turǵyn jáne ákimshilik ǵımarattary, saıabaq aımaqtary, saýda, oıyn-saýyq ortalyqtary men áleýmettik-ekonomıkalyq nysandar salý, ınnovatsııalyq tehnologııalar men ekologııalyq taza qurylys, sondaı-aq jańartylatyn energııa kózderi salasyndaǵy halyqaralyq tájirıbe qoldanyla otyryp, astanalyqtar úshin asa jaıly oryn quralatyn bolady.