Astanada Botaı jylqysyna eskertkish ornatylyp, ashyq aspan astynda mýzeı qurylýy múmkin

<p>PETROPAVL. KAZINFORM &ndash; Qolǵa alǵash jylqy úıretilgen Botaı mádenıetin jáne at sportyn nasıhattaý maqsatynda Astana qalasynda birqatar is shara qolǵa alynady.&nbsp;</p>

Búgin Astanada respýblıkalyq «JORYQ» at sporty federatsııasynyń prezıdenti Baqytjan Turlybekov pen Astana qalasy Ulttyq jáne olımpıadalyq at sporty túrleri federatsııasynyń prezıdenti Erlan Kanalımov Memorandýmǵa qol qoıdy. 

Foto: «JORYQ» at sporty federatsııasy baspasóz qyzmeti

Federatsııanyń baspasóz qyzmetiniń málimetinshe, 14 tarmaqtan turatyn Memorandým eki federatsııa arasyndaǵy áriptestikti, yntymaqtastyqty nyǵaıtýdy jáne at sportyn damytý men tanymaldyǵyn arttyrýdy kózdegen. 

Atap aıtqanda, taraptar birlese otyryp at sportyn tıimdi damytýǵa baǵyttalǵan bastamalaryna qoldaý kórsetýge, Qostanaı jáne Adaı jylqylarynyń tuqymyn, jylqy maly qolǵa alǵash úıretilgen Botaı mádenıetin nasıhattaý barysynda birlesken jumys júrgizýge ýaǵdalasty.

Nátıjesinde Astana qalasynyń shaǵyn saıabaqtarynyń birinde Botaı jylqysyna eskertkish ornatý jáne saıabaqty sol taqyrypta abattandyrý men Astana qalasynda ashyq aspan astynda Botaı mádenıetiniń mýzeıin uıymdastyrý boıynsha birlesip jumys atqarýdy da josparlap otyr.

Sonymen qatar eki federatsııa at sportyna úles qosqan azamattardy jyl saıyn qoshemetteý jáne marapattaý saltanatty sharasyn uıymdastyryp, joǵary oqý oryndarymen birlesken sharalar ótkizbekshi. Buǵan qosa qazaq jylqysyn, onyń qazaq turmysy men mádenıetindegi ornyn nasıhattaý jolynda Astana qalasyndaǵy Jastar teatrynda arnaıy qoıylym kórsetý boıynsha birlesken jumys ta qolǵa alynbaq.