Astanada bos jumys oryndary jármeńkesi ótti

ASTANA. QazAqparat - Elordadaǵy «Jastar» saraıynyń ǵımaratynda bıylǵy jyldyń eń sońǵy bos oryndar jármeńkesi ótti. Jumyssyz azamattarǵa 60-tan asa jumys berýshi bos oryndar usyndy.

Jumys izdeýshiler túrli salalarda myńǵa jýyq qyzmet túrin tańdaýǵa múmkindik aldy, dep habarlaıdy astana. kz.

Astana turǵyny Saırangúl Rahmetova bos oryndar jármeńkesine alǵash ret kelgen.

«Jármeńke jaqsy uıymdastyrylǵan, uıymdastyrýshylar bul iske jaýapty qaraǵany kórinip tur, jumys berýshiler de, jastar da kóp. Jármeńke barlyq sanattaǵy azamattarǵa eseptelgen, jas boıynsha shekteý joq. Meniń mamandyǵym - ekonomıst, memlekettik mekemelerde, aktsıonerlik qoǵamdarda, densaýlyq saqtaý, bilim mınıstrlikteriniń janynda eńbek ettim. Adamdar osy jerde jumys taba alady, óıtkeni bos oryndar kóp, tańdaýǵa múmkindik bar», - deıdi Saırangúl Rahmetova.

Astana qalasy ákimdiginiń Jumyspen qamtý ortalyǵy jyl boıy júıeli negizde bos jumys oryndary jármeńkesin ótkizip keldi.

«Biz bıyl 11 bos jumys oryndary jármeńkesin ótkizdik, bul  sońǵy, 12-shi jármeńke. 11 jármeńkeniń qorytyndysy boıynsha 400-den asa adam turaqty jumysqa ornalastyryldy, taǵy ondaǵan adam áńgimelesýden ótýde. Bos jumys oryndarynyń jármeńkesi - óz qajettilikterin qanaǵattandyrý úshin jumys berýshilerge de, jumys izdeýshilerge de yńǵaıly alań», - dep atap kórsetti Astana qalasy ákimdiginiń Jumyspen qamtý ortalyǵynyń dırektory Oljas Omar.

Jyl basynan beri Jumyspen qamtý ortalyǵyna 12 myńnan asa adam júgingen. Bıyl Astanada 16 myńǵa jýyq jańa jumys orny quryldy.