Astanada bombadan qorǵanýǵa arnalǵan oryndar bar ma

ASTANA. QazAqparat – Astanada bombalaýdan qorǵaıtyn bombapana bar ma? QR Tótenshe jaǵdaılar mınıstriniń birinshi orynbasary Ibragım Kúlshimbaevtyń elorda turǵyndarymen kezdesýinde osyndaı saýal qoıyldy, dep habarlaıdy QazAqparat tilshisi.

Vıtse-mınıstrdiń sózine qaraǵanda, qazirgi zańnamada kópqabatty úılerdiń parkıngterin soǵys jaǵdaıynda «qorǵanys orny» retinde paıdalaný kózdelgen.

«Qazirgi zańnamada «bombadan qorǵanatyn arnaıy oryn» degen termın joq. Ol negizi halyqtyń arasynda burynnan qalyp qoıǵan uǵym ǵoı. Qazir «qorǵaý nysandary» dep aıtamyz. Onyń bári qazir ashyq aqparatta joq. Qorǵaný nysandary zań boıynsha soǵys jaǵdaıynda úzdiksiz jumys isteıtin nysandarda jáne medıtsınalyq mekemelerde ǵana bar. Aýyryp jatqan adamdardy evakýatsııalaý múmkin bolmaǵanda solar úshin ǵana qorǵaý oryndary qarastyrylǵan. Al basqalarǵa «qarapaıym panalaý oryndary» degen bar», - degen mınıstrlik ókili jyl saıyn atalǵan sanattaǵy nysandar esepke alynyp otyratynyn atap ótti.

«Bizdiń qazirgi zań boıynsha úlken páterlerdiń astynda ornalasqan parkıngterdi, bárin de qoldanýǵa bolady. Onyń bárin biz eseptep, qarastyryp otyrmyz. Jyl saıyn jaǵdaıy nasharlaǵan nysandar boıynsha óz usynystarymyzdy berip, iske asyryp otyrmyz», - dedi Ibragım Kúlshimbaev.