Astanada bolashaq analarǵa arnalǵan alǵashqy arnaıy klınıkalar ashyldy

<p>ASTANA. KAZINFORM &ndash; Elordada birden eki &laquo;Bir kúndik klınıka&raquo; ashyldy. Birinshi nysan Ana men bala ortalyǵynda, ekinshisi №2 qalalyq kópbeıindi aýrýhanada ornalasqan. Joba júkti áıelderde uryq dıagnostıkasynyń tıimdiligin arttyrýǵa jáne &laquo;bir tereze&raquo; qaǵıdaty boıynsha kómek uıymdastyrýǵa baǵyttalǵan.&nbsp;</p>

«Bir kúndik klınıkanyń» basty mıssııasy – bolashaq analarǵa múmkindiginshe sapaly, jan-jaqty jáne jaıly medıtsınalyq kómek kórsetý, protsedýralar men konsýltatsııalarǵa ketetin ýaqyt pen kúsh-jigerdi azaıtý.

«Klınıka júkti áıelderge birinshi trımestrde prenataldy skrınıng júrgizýdiń jańa biregeı ádisin usynady. Bolashaq analar bıohımııalyq jáne birinshi trımestrdiń ýltradybystyq skrınınginen ótý, qajet bolǵan jaǵdaıda genetıktiń keńesin alý sııaqty barlyq qajetti qyzmetti bir kúnde, bir jerden ala alady. Bul bolashaq analarǵa ÝDT, zerthanalyq tekserý úshin qan tapsyrý, beıindi mamandarǵa jazbany kóp kúttirmeı, ýaqytty únemdeýge múmkindik beredi, sol arqyly dál sol kúni balasynyń densaýlyǵy týraly tolyq kólemde bilýge jáne sábı ólimi men balalar múgedektiginiń aldyn alýǵa múmkindik beredi», - dep atap ótti aýrýhana dırektory Nurbol Tursynbaev.

Bıohımııalyq prenataldy skrınıng FMF Halyqaralyq uryq medıtsınasy Fondymen sertıfıkattalǵan, 2024 jylǵy avtomattandyrylǵan ımmýnoanalızator kómegimen júrgiziledi. 30 mınýt ishinde qurylǵy úlgini óńdeýden ótkizip, nátıjeni jedel daıyndap shyǵarady. Uryqtyń anatomııasyn muqııat, dál zertteýge baǵyttalǵan baǵdarlamalary bar zamanaýı saraptamalyq apparattarda ýltradybystyq skrınıngten ótý múmkindigi qamtamasyz etilgen. 

Osylaısha dárigerlerdiń quramdastyrylǵan saraptamalary men zamanaýı qural-jabdyqtardyń arqasynda júkti áıelder bir mezette qajetti medıtsınalyq usynystarǵa qol jetkize alady. Bolashaq analarǵa zertteý nátıjelerin kútetin sátte tátti as-dám usynylady. 

Qalalyq klınıkaǵa joldamany júkti áıelder tirkelgen jeri boıynsha emhanada ala alady. Klınıka jumys kúnderi tańǵy 8:00-den bastap jumys isteıdi.