Astanada «Blagodat» dinı birlestiginiń pastory Baqytjan Qashqymbaev tutqyndaldy - BAQ-qa sholý

ASTANA. 22 mamyr. QazAqparat - «QazAqparat» agenttigi respýblıkalyq basylymdarda 22 mamyr, sársenbi kúni shyqqan ózekti materıaldarǵa sholýdy usynady.

***

«Jalpy, tynyp turǵan, tunyq turǵan tabıǵatqa tıispegenge ne jetsin! Oral qalasy janyndaǵy osyndaı tabıǵattyń tamasha qoınaýy - Shaǵan ózeniniń orta tusyndaǵy «alaqandaı aral» edi. Iá, mundaǵy syńsyp ósip turǵan aǵashtar men tal-terekterdi oblys ortalyǵyna taza dem beretin jasyl beldeý dese de bolady. Alaıda úsh jyl buryn bul jabaıy qoltyqty ıgeremiz, adamnyń tańdaıyn qaqtyratyn demalys ornyna aınaldyramyz degen jeleýmen ony otarlaý bastaldy da ketti. Bul shabýyldyń basy adam aıaǵy basa bermeıtin aral-toǵaıǵa aparatyn jaıaý júrginshilerge arnalǵan kópir qurylysyn salýdan bastaldy. Qarap otyrsańyz, atalǵan jobanyń ataýy dardaı: áleýmettik nysan degen qu­laqqa áýezdi estiletin kórkem sóz­dermen búrkemelengen. Onyń quny 167 mıllıon teńge qu­raıdy. Alǵashynda, buǵan ártúr­li qoǵamdyq qorlardan 140 mıllıon teńge bólinip, soǵan sáı­kes «BatysJolQurylys» JShS merdigerlik uıymy tıis­ti jumystaryn atqarǵan. Sodan keıin bul qurylys tolyq aıaqtalmaı turyp qaldy. Oǵan qala turǵyndary men demalys saıabaǵyna kelýshiler kýá. Árı­ne gáp basqada, gáp kópirdiń kerek­siz, artyq qurylys ekeninde»,-dep jazady «Egemen Qazaqstan» basylymy «Artyq qylamyn dep, tyrtyq qyldy» degen maqalada.

Osy basylymda «Aýylda jastar azaıyp barady» atty maqala berilip otyr. Osydan on­shaqty jyl aldynda onshalyqty ańǵa­ry­la qoımaýshy edi. Bul kúnde birden baıqa­latyn bolyp otyr. Baıaǵydaı balaqaıy shúpirlegen, jastary tolǵan aýyldar sırep barady. Aldan zeınetkerlikten asqan, zeınetkerlikke jaqyn jandar shyǵady. Aýyl jumysynan sharshaǵan, tirshilik qamyn amalsyz arqalaǵan aǵaıyn aralarynda tepse temir úzetinderdiń azaıýyna kózderi úırengen, kóńilderi kóndikken syńaıly. «Munda ne ermek qylsyn. Kásipke laıyq is joq. Mal baǵýdy, egin egýdi qıynsynady. Qalada kúzetshi bolsa da kún kórerlik jaǵdaı tartsa qalaı turar. Endi shamaly ýaqytta bizdiń ornymyzdy basatyndar qalmasa tańdanýǵa bolmas», - deıdi.

***

«Aıqyn» gazetiniń jazýynsha, «Astana qalasynda kelgen adamdarǵa dári berip, dýalaǵan «Blagodat» dinı birlestiginiń pastory Baqytjan Qashqymbaev qamaýǵa alyndy» dep habarlady Astana qalalyq ishki ister departamentinen Sofııa Qylyshbekova. Dinı uıymnyń pastory B.Qashqymbaevtyń qylmystyq áreketterine qatysty qylmystyq is byltyr kúzde, qarasha aıynda qozǵalǵan eken, alaıda qamaýǵa endi alyndy. «Astanalyq «Blagodat» qaıyrymdylyq mıs­sııa­sy» dinı birlestigi quqyq qorǵaý organdarynyń naza­ryna baıaǵyda ilingen. Budan eki jyl buryn osy dinı uıym­nyń negizin qalaýshy, mıssııanyń rýhanı je­tekshisi Koreıa azamaty Kım Sam Son Almaty áýe­jaıynda ustalǵan bolatyn. «Blagodat» mıssııasyn uıymdastyrýshy 130 myń dollardy elden zańsyz alyp ketpekshi bolǵan. Ol kedenshilerge bul aqshany shir­keýlerine keletin jomart adamdardyń sadaqasy dep túsindirgen. Bul jaııynda basylymdaǵy «Adamdardy dýalap, dinge tartqan» degen maqaladan oqı alasyzdar.

Osy basylymda «Balalar demalysta bos júrmeıdi» atty maqala jarııalandy. Úkimettiń keshegi otyrysynda Mınıstrler kabınetiniń músheleri de BǴM-nyń máselesin qarady. Bul joly kún tártibine aldaǵy jazǵy kezeńde balalardy saýyqtyrý, bos ýaqytyn, demalysyn uıymdastyrý jaıy shyǵaryldy. Mınıstr Baqytjan Jumaǵulov balalardyń tól merekesi kúni, ıaǵnı 1 maýsymda jazǵy saýyqtyrý kezeńi bastalatynyn jetkizdi. Ókinishke qaraı, onyń barlyq balalardy birdeı qamtymaıtyndyǵy anyqtaldy. Keıbir óńirlerde oqýshylardyń basym kópshiligi «Sońǵy qońyraýdan» keıin kóshe shańyn burqyratyp, bos sandalmaq.

***

«Kazahstanskaıa pravda» gazetiniń jazýynsha, keshe Qazaqstan Prezıdenti Nursultan Nazarbaev Shetel ınvestorlary keńesiniń alda bolatyn otyrysyna qatysýshylarmen kezdesý ótkizdi. Kezdesýge Eýropa aeroǵarysh jáne qorǵanys kontserniniń (EADS) basshylary - prezıdenti Tomas Enders, prezıdent apparatynyń jetekshisi Nıkolas Chamýssın, halyqaralyq damý jónindegi bas atqarýshy dırektory Jan-Per Talamonı, sondaı-aq, «Eırbas» kompanııasynyń bas atqarýshy dırektory Djon Lıhı jáne «EADS Qazaqstan» bas dırektory Sılver Delone qatysty. Kezdesý barysynda aeroǵarysh salasyndaǵy ózara is-qımyldy da­mytý perspektıvalary talqy­landy. Memleket basshysy Qazaq­stan­nyń atalǵan kompanııalarmen yntymaqtastyǵy jaqsy qar­qy­nmen damýda ekenin atap ótti. «Sizderdiń delegatsııa qu­ramyn­da kelýlerińiz bul jumys jalǵasyn tabatynyn bildiredi. Biz buǵan deıin de meniń Pa­rıjge saparym barysynda kezdestik. Jasalǵan kelisimder yntymaqtastyǵymyzdyń aıasy dáıektilikpen ulǵaıa túsetinin kór­setedi», - dedi Nursultan Nazarbaev.