Astanada «Biz – Uly Dala Eliniń urpaqtarymyz!» atty gala-kontsert ótti (FOTO)

ASTANA. QazAqparat - Balalardy qorǵaý kúnine oraı Astanada «Biz - Uly Dala Eliniń urpaqtarymyz!» atty gala-kontserti ótti. Gala-kontsertke Memlekettik hatshysy G. Ábdiqalyqova, QR Premer-mınıstriniń orynbasary D.Nazarbaeva, Bilim jáne ǵylym vıtse-mınıstri E. Suhanberdıeva qatysty.

Kontsertke kelgen balalar men olardyń ata-analaryn quttyqtaǵan Memlekettik hatshy G.Əbdiqalyqova Qazaqstandaǵy balalardyń eń birinshi qamqorshysy Elbasy Nursultan Nazarbaev táýelsizdik alǵan alǵashqy jyldary balalardy qorǵaý týraly konventsııaǵa qol qoıǵanyn atap ótti.

«Budan keıin 60-qa jýyq ár túrli konventsııalar qabyldandy, sonyń ishinde 15 qujat balalardyń quqyǵyn qorǵaýǵa tikeleı baılanysty. Qazirgi kezde zamanǵa saı jaı kóptegen zańdar ázirlendi. Balalarǵa arnalyp ǵımaratta salynyp jatyr. Ár oblysta Nazarbaev zııatkerlik mektepteri ashyldy. Daryndy balalarǵa arnalǵan mektepte bar. Sport keshenderi boı kóterýde. Bunyń bári elimizdegi tynyshtyq pen kelisimniń nátıjesi dep bilemiz», - deı kele Memlekettik hatshy Balalardy qorǵaý kúni mereke ǵana emes, problemalardy sheshetin kún ekenin atap ótti.

«Árıne, bul kúni biz balalardy quttyqtap, jetistikterińizdi aıtamyz. Sonymen qatar, árıne, bul kún balalardyń problemasyn aıtyp, memlekettiń, qoǵamnyń, ata-analardyń kóńil aýdarýyn talap etetin kún dep oılaımyn. Búginde túıitkilder bar, álbette. Bul - múmkindigi shekteýli balalardyń máselesi. Olardyń sany 140 myńnan asady, sonyń ishinde tek 60 myńǵa jýyǵynyń ǵana ınklıýzıvti bilim alýǵa múmkindigi bar. Memlekettik uıymdarda jetim balalar tárbıelenip jatyr. Árıne, barlyq balalardyń ata-anasy bolýy qajet. Turmysy nashar otbasylar bar.

Úsh aýysymda oqytatyn jáne apattyq mektepter, balabaqshalar jetispeýshiligi máselesi de joq emes. Osy túıitkilderdi sheshýimiz kerek»,-dedi G.Əbdiqalyqova.