Astanada bıylǵy oqý jylynda birden 9 mektep paıdalanýǵa beriledi

ASTANA. QazAqparat - Astanada jańadan salynǵan tórt myń oryndyq iri-iri 5 mektepte 20 mykń oqýshy oqyp júr. Bul jaıynda shahar basshysy Altaı Kólginov málim etti, dep habarlaıdy QazAqparat.

«Birqatar mekteptiń qurylys barysymen tanystym. Rysqulov – Qaısenov kósheleriniń, Uly Dala dańǵyly men Saýran kóshesi, sol sııaqty Qoshqarbaev, Uly Dala dańǵyly jáne №39 kósheleriniń qıylystarynda salynyp jatqan oqý oryndaryna bardym. Bıylǵy oqý jylynda taǵy 9 oqý ornynyń qurylysyn aıaqtaýdy josparlap otyrmyz. Onyń bir bóligi úshinshi toqsannan bastap jumys isteıdi. Osyǵan deıin 36 mektep salynyp, paıdalanýǵa berilgen bolatyn. Máselen Rysqulov pen Qaısenov kósheleriniń qıylysynda ornalasqan mektep 4 myń oqýshy ornyna (2 aýysymdy) eseptelgen. Bul – iri mektep. Qazir onda sońǵy jumys júrip jatyr. Búginge deıin osyǵan uqsas bes iri mektep ashtyq. Osy bes mekteptiń esebinen 20 myń oqýshy orny quryldy», - dep jazdy Altaı Kólginov Instagram paraqshasynda.

Uly dala dańǵyly men Saýran kóshesinde ornalasqan mektep 2400 orynǵa (2 aýysymdy), Uly dala dańǵyly men №39 kósheniń qıylysyndaǵy mektep 2400 orynǵa eseptelgen.

Rysqulov kóshesindegi oqý ornynyń qurylysy jeke ınvestıtsııa esebinen júrip jatyr, onda balabaqsha da bolady.

«Sol sııaqty mektep salý úshin 158 jer ýchaskesin anyqtadyq. Jer ýchaskeleri áleýmettik nysandardyń qajettiligin eskere otyryp, qalanyń barlyq aýdanynda ornalasqan. Egjeı-tegjeıli josparlaý jobasyna ár aýdanda oqý oryndary bolýy jóninde arnaıy baǵyt bekitildi» deıdi ákim.