Astanada bıyl jańa onkologııalyq ortalyqtyń qurylysy bastalady
«Turǵyndardyń ómir sapasyn kóterý tapsyrmasy aıasynda 22 shara qarastyrylǵan. Bilim berý salasynda mektepke deıingi, orta jáne joǵary bilim sapasyn kóterý sharalary kózdelgen. Muǵalimder men bilim berý salasyndaǵy mamandardy yntalandyrý úshin kelesi jyly «Pedagog mártebesi týraly» Zań qabyldanady. Densaýlyq saqtaý salasynda medıtsınalyq qyzmet kórsetý sapasy jaqsarady. Bıyl Astanada jańa Ulttyq ǵylymı onkologııalyq ortalyqtyń qurylysy bastalady, ortalyq eń zamanaýı quraldarmen jabdyqtalady», - dedi Tımýr Súleımenov Úkimet otyrysynda.
Sonymen birge, mınıstr halyqty sapasyz jáne qaýipti taýarlardan, qyzmetterden qorǵaý úshin Taýarlar men qyzmetterdiń sapasy men qaýipsizdigin baqylaý Komıteti qurylatynyn habarlady.
«Úshinshi tapsyrma - ómir súrýge qolaıly orta jasaý aıasynda elimizdiń barlyq eldi mekeninde turǵyn úı jaǵdaılaryn jaqsartý jumystary júrgiziledi. 2030 jylǵa deıingi eldegi aýmaqtyq-keńistiktiń damýyna arnalǵan boljamdyq keste jasalady. Ol úshin kelesi jyly 2025 jylǵa deıingi óńirlerdi damytý baǵdarlamasy qabyldanady», - dep óz sózin tolyqtyrdy T. Súleımenov.
Mınıstr kóliktik ınfraqurylym men kommýnaldyq turǵyn úı qurylysy úshin «Nurly jol» jáne «Nurly jer» memlekettik baǵdarlamasyn júzege asyrýdyń 2025 jylǵa deıin sozylatynyn eske saldy.
«Quqyq qorǵaý organdarynyń jumysyn jetildirý men azamattardyń qaýipsizdigin qamtamasyz etý úshin Іshki ister organdaryn jańǵyrtý boıynsha Jol kartasy qabyldanady. Jol kartasy halyqpen jumys isteýdiń, qoǵamdyq qaýipsizdikti baqylaý júıesin qamtýdyń jańa formatyn qarastyrady. Sot júıesin jańǵyrtý jumystary da jalǵasady», - dedi T. Súleımenov.