Astanada bıyl turǵyn úılerdi jóndeýge 500 mln. teńgeden astam qarjy bólý josparlanýda

ASTANA. QazAqparat - 2015 jylǵa arnalǵan Turǵyn úı-kommýnaldyq sharýashylyǵyn qaıta jańǵyrtý baǵdarlamasyn júzege asyrý aıasynda «Órken qala» kásiporny aǵymdaǵy jylǵa arnalǵan baǵdarlamany túsindirý jáne Astanadaǵy kúrdeli jóndeýdi qajet etetin 65 turǵyn úıdiń azamattaryna tólem jasaý boıynsha is-sharalar ótkizdi.

Qazirgi kezde kásiporyn Ulttyq ekonomıka mınıstrligine 21 turǵyn úıdi jańǵyrtýǵa 1 mlrd. teńgeden astam somaǵa ótinim berdi. Aıta keteıik, atalǵan vedomstvo 2015 jyly turǵyn úılerdi kúrdeli jóndeýge 500 mln. teńge kóleminde qosymsha qarjy bólýdi josparlap otyr, dep habarlaıdy elorda ákimdiginiń baspasóz qyzmetinen. Sonymen qatar baǵdarlamada halyqtyń áleýmettik osal toptary, atap aıtqanda, kópbalaly otbasylar; jasyna qaraı zeınetkerler; Uly Otan soǵysynyń qatysýshylary men múgedekteri; 1 jáne 2 toptaǵy múgedekter; jıyrma toǵyz jasqa tolmaǵan, kámeletke tolǵanǵa deıin ata-anasynan aıyrylǵan jetim jáne ata-anasynyń qamqorlyǵynsyz qalǵan balalar; memlekettik nemese qoǵamdyq mindetterdi oryndaý kezinde, áskerı qyzmet, ǵaryshqa ushýǵa daıyndyq nemese ushý, adam ómirin qutqarý, quqyqtyq tártipti qorǵaý kezinde qaza tapqan tulǵalardyń otbasylary; oralmandar; tolyq emes otbasylar úshin turǵyn úı kómegi qarastyrylǵan. Bul rette turǵyn úı kómegi 70%-ǵa deıin jetedi. Mysaly, aı saıynǵy jarna 4402,19 teńgeni qurasa, mundaı turǵyn 1320,67 teńge ǵana tóleıtin bolady. Búgingi tańda «Astana qalasynyń Jumyspen qamtý jáne áleýmettik baǵdarlamalar basqarmasy» MM turǵyndarǵa 70 mln. teńge bóldi. Eske salaıyq, 2014 jyly baǵdarlama aıasynda 20 kóppáterli turǵyn úı keshenine kúrdeli jóndeý jumystary júrgizildi.