Astanada bir kúnde bes bala joǵalyp, aman-saý tabyldy
19 shilde kúni saǵat 20.00 shamasynda «Prezıdent saıabaǵyndaǵy» patrýldik marshrýtta bir áıel joǵalǵan eki balasyn tabý úshin ulandyqtarǵa júgingen. Anasy olardyń belgilerin aıtyp, syrtqy kıimderin sıpattady. Áskerı jasaq bastyǵy, qatardaǵy Azamat Sheńgelbaev, patrýldik qatardaǵy Ermek Asqarov pen Baýyrjan Baqyt jáne taǵylymdamadan ótýshi Ábdirahman Qadirmen kórshi jasaqtarǵa joǵalǵan balalardyń belgilerin aıtyp, ózderi izdeýge kirisedi. Shamamen 20 mınýttan keıin áskerı qyzmetshiler sýburqaqtyń janyndaǵy oıyn alańynan balalardy taýyp, anasyna tapsyrdy.
Sonymen birge, osy keshte Baıqońyr aýdanynda qatardaǵy jaýynger Sanjar Dákenov bastaǵan patrýlshiler – qatardaǵy Nurdáýlet Ýbaıdýllın men Dastan Elek taǵy bir qyraǵylyq úlgisin tanytady. Olarǵa D. Esimdi turǵyn óz ulyn tabý týraly ótinish bildirgen. Ol aýlada kózden tasa bolǵan ulyn óz betinshe izdegen, biraq taba almaǵan. Áskerıler dereý iske kirisip, kóp uzamaı joǵalǵan balany taýyp berdi.
Saǵat 20.20 shamasynda «Trıatlon» saıabaǵyndaǵy patrýldeý marshrýtynda Almaty aýdanynda qoǵamdyq tártipti saqtaý qyzmetin atqaryp júrgen ulandyq jasaq jylap otyrǵan balany kóredi. Áńgime barysynda balanyń adasyp, ata-anasyn taba almaǵany belgili boldy. Áskerı jasaq bastyǵy qatardaǵy Nursultan Ahmetov pen qatardaǵy Edýard Davletov, Kemel Áýken jáne Rýslan Hasanovtar dereý balanyń ata-anasyn izdeýge bet alady. Nátıjesinde, 20 mınýttan keıin ulandyqtar adasqan balanyń ata-anasyn tapqan. Olar óz kezeginde áskerı jasaqqa, bólimniń qolbasshylyǵyna alǵystaryn bildirdi.
Taǵy bir oqıǵa Saryarqa aýdanynda saǵat 20:32-de tirkeldi. Onda 5 jasar ulyn joǵaltqan áıel kómekke júgingen.
«Balanyń aıryqsha erekshelikterin surap alyp, osy aımaqtaǵy barlyq áskerı jasaqtarǵa habar berdik. Bárimiz izdeýge kiristik, sálden soń áskerı jasaq bastyǵy, qatardaǵy jaýynger Rozmat Rasýlov jáne saqshylar Nurdáýlet Ábýtálipuly, Mereke Úsen jáne men Jeńis kóshesindegi úıdiń aýlasyndaǵy balanyń barlyq sıpattamaǵa saı keletinin baıqadyq», - dedi patrýldik toptyń bastyǵy serjant Bekbolat Mahamatov.