Astanada «Beıbitshilik aǵashy» ınstallıatsııasy ashyldy

ASTANA. QazAqparat - Senat tóraǵasy, Álemdik jáne dástúrli dinder lıderleri sezi Hatshylyǵynyń basshysy Máýlen Áshimbaev «Beıbitshilik aǵashy» ınstallıatsııasyn kópshilikke saltanatty tanystyrý rásimine qatysty, dep habarlaıdy QazAqparat.

Elordada boı kótergen óner týyndysyna álemdik jáne dástúrli dinder lıderleriniń izgi tilekteri men joldaýlary jazylǵan.

Óz sózinde Máýlen Áshimbaev sezd dinaralyq dıalogty jalǵastyrýǵa eleýli úles qosatynyn jáne rýhanı qundylyqtardy, dıalog pen ózara qurmet mádenıetin ilgeriletý isindegi mańyzdy bastama ekenin aıtty.

«Álemdik jáne dástúrli dinder lıderleriniń VII Sezi deńgeıi men qatysýshylardyń sany jaǵynan da, búgingideı álemdik qoǵamdastyq úshin kúrdeli kezeńde qaralǵan máselelerdiń mańyzy jaǵynan da tarıhı ári biregeı oqıǵa boldy. Rım Papasy Frantsısk, Ál-Azhardyń Joǵarǵy ımamy Ahmed at-Taıeb jáne basqa da álemdik din lıderleri qazirgi álemniń damýyna, dıalog, ózara qurmet, beıbitsúıgishtik mádenıetin ilgeriletýge qatysty ózekti máselelerdi kóterdi. Onyń bári forýmnyń qorytyndy Deklaratsııasyna engizildi. Osyndaı tarıhı oqıǵadan jasampaz estelik retinde biz eki shyǵarmashylyq jobany qolǵa alǵan edik. Onyń biri Astanadaǵy zamanaýı jáne kópbeıindi Beıbitshilik jáne kelisim saıabaǵy. Ekinshi – álemdik din lıderleriniń izgi tilekteri jazylǵan «Beıbitshilik aǵashy» atty ınstallıatsııa», – dedi Máýlen Áshimbaev.

Sondaı-aq Senat tóraǵasy bıyl qyrkúıek aıynda Astanada ótken Álemdik jáne dástúrli dinder lıderleriniń VII sezine álemniń 50-ge jýyq elinen 100-den astam delegat qatysqanyn atap ótti. Olardyń qatarynda ıslam, hrıstıan, ıýdaızm, ındýızm, sıntoızm, daosızm, býddızm, bahaızm jáne djaınızm dinderiniń ókilderi bar.

«Beıbitshilik aǵashy» ınteraktıvti óner ınstallıatsııasy sezd ıdeologııasyna taban tireıtin áleýmettik-fılosofııalyq qaǵıdattardyń biri – álemdik jáne dástúrli dinder arqyly jalpyadamzattyq ortaq qundylyqty izdeýdi sıpattaıdy. Jańa týyndyǵa VII Sezge qatysýshylardyń óz qoldarymen jazylǵan mátinderi qosylǵan. Jobanyń avtory – belgili sýretshi Leıla Mahat.

Aıta keteıik, is-sharaǵa Parlament depýtattary, Qazaqstandaǵy birqatar sheteldik dıplomatııalyq mıssııalardyń basshylary, joǵary oqý oryndarynyń, dinı jáne qoǵamdyq birlestikterdiń ókilderi qatysty.