Astanada «Baıtaq» jasyldar partııasynyń kezekti ІІІ sezi ótti
Aýqymdy jıynǵa partııanyń barlyq óńirlik fılıaldarynyń tóraǵalary men belsendi músheleri qatysty.
Sezdiń ashylýynda alǵash bolyp sóz alǵan partııa tóraǵasy Azamathan Ámirtaev saıası uıymnyń atqarǵan jumystaryna toqtala kele, partııany uıystyrǵan basty múddeni eske saldy.
«Bul partııa eń aldymen Qazaqstan halqynyń bolashaǵy úshin qurylǵanyn eske salamyn. Keleshek urpaqtarynyń ıgiligi jolynda jumys isteýimiz kerek. Álemdegi ýrbanıstik máselelerdi kóre otyryp, oǵan der kezinde áreket etpeý, tabıǵı ortaǵa beı-jaı qaraý jaqyn arada jahandyq deńgeıdegi ekologııalyq apatqa ákelýi múmkin. Sondyqtan biz qarapaıym turǵyndardyń ómir súrý sapasyn jaqsartý úshin zańnamalyq bazany ózgertý arqyly qajetti deńgeıde kóńil bólý kerek dep sanaımyz. «Jasyl» partııalar álemniń 90-ǵa jýyq elinde bar. Biz olarmen birlese otyryp, ózara tıimdi is-qımyl jasaýǵa múddelimiz», - dedi Azamathan Ámirtaev partııanyń kezekti sezinde sóılegen sózinde.
Munymen qatar, sezde saıası keńes quramy jańartylyp, ózge de partııaishilik komıssııa tóraǵalarymen olardyń músheleri saılandy.
Sondaı-aq, saıası uıymnyń keleshek jumys jospary men mindetteri bekitildi.
Aıta ketý kerek, «Baıtaq» jasyldar partııasy byltyr 28 qarashada resmı tirkeldi jáne bıyl naýryzda ótken Parlament saılaýyna qatysty.
Onyń nátıjesinde partııa máslıhattardan 23 mandat aldy.
Búginde «Baıtaqtyń» Qazaqstan boıynsha 20 fılıaly jumys isteıdi, 30 myńnan asa partııa múshesi bar.
Sondyqtan sezde osy aralyqta saıası uıymnyń atqarǵan jumystary baıandaldy.
«Bizdiń búkil el boıynsha kásibı mamandarymyz bar. Olar tabıǵı resýrstardy teris maqsatta paıdalanýdy azaıtý úshin áleýmettik reformalar jasaý isine óz úlesin qosyp keledi. Búginniń ózinde bul baǵytta oń ózgerister bar», - dep toqtaldy partııa tóraǵasy.
Onyń sózinshe, ózi jetekshilik etip otyrǵan saıası uıym jylý elektr ortalyqtaryna qatysty ustanystar daıyndap, quzyrly organdarǵa joldaýda.
Azamathan Ámirtaev bul máseleniń mańyzyn atap, byltyr elimiz boıynsha jylý elektr ortalyqtarynda bolǵan iri apattardy mysalǵa keltirdi.
«Qalalardaǵy halyq sanynyń ósýi jáne tutynýshylar sanynyń artýyna baılanysty rezervterdiń sarqylý qaýpi bar. Zańnamalyq bazany ózgertý, kásiporyndardy jańǵyrtý, qaýipsiz eńbek jaǵdaılaryn jasaý, bızneske járdemdesý arqyly biz áleýmettik jáne ekologııalyq problemalardy sheshe alamyz. Bul óz kezeginde el ekonomıkasyna tıetin teris áserlerdiń aldyn alýǵa yqpal etedi», - dep usynys bildirdi Azamathan Ámirtaev partııalastarynyń aldynda baıandama jasaı otyryp.
«Baıtaq» jasyldar partııasynyń músheleri Memleket basshysy Qasym-Jomart Toqaevtyń Jarlyǵymen bekitilgen «Qazaqstan Respýblıkasynyń 2060 jylǵa deıingi kómirtegi beıtaraptyǵyna qol jetkizý strategııasynyń» mańyzy joǵary ekenin atap ótti.
Osy baǵyttaǵy jumystardy atqarý úshin atalǵan saıası uıym óz tarapynan tolyq qoldaý kórsetýge ázir ekenin málimdedi.
Buǵan qosa, partııa tóraǵasy Azamathan Ámirtaev keıingi jyldary jıilep ketken basty problemany atady.
Ol – orman órtteri. Azamathan Ámirtaev eldiń ekologııalyq ahýalyna aıtarlyqtaı zalal keltirip, Qostanaı men Semeı ormanynyń birshama aýmaǵyn kúlge aınaldyrǵan tilsiz jaýdyń aldyn alýǵa baǵyttalǵan sharalar qabyldaý mańyzdy ekenin basa aıtty.
«Semeı ormanynyń» múshkil hálde turǵanyn biz sáýir aıyndaǵy Parlament otyrysynda eskerttik. Men únemi elimizdiń túkpir-túkpirine is sapar jasap, fılıaldar men túıtkili sheshilmegen oryndarǵa baramyn. Biz 23 sáýirde «Semeı ormany» rezervatynyń jaı-kúıi nashar ekenin jetkizdik. Alaıda, bizdi eshkim estimedi jáne onyń zardaby 14 adamnyń ómirin jalmady. Árıne, eger biz Májiliske ótkende daýysymyz estiler edi. Bul jaǵdaılar bizdiń partııamyz sol jerde bolýy kerek degen belgi sııaqty», - dep pikir bildirdi Azamathan Ámirtaev.
Sezde kóterilgen iri máseleniń biri – qorshaǵan ortaǵa zııandy shyǵaryndysy az, balamaly energııa kózderin damytý.
Jınalǵan partııa sarapshylarynyń aıtýynsha, elektr energııasyn ekologııalyq taza jolmen óndirý lastaný deńgeıin birneshe ese azaıtady.
«Jasyl energııany turaqty óndirý jáne tutyný uzaq ýaqyt boıy álem elderiniń kún tártibinde turǵan másele. Biz memleket tarapynan qoldaý qajet dep sanaımyz. Osyndaı jobalardy qarjylandyrýdy ulǵaıtý úshin jumys isteý mańyzdy. Bizdiń maqsat ta osy», - degen pikirde «Baıtaq» jasyldar partııasynyń músheleri.
Budan bólek, saıası uıym quramyndaǵy sarapshylar Almaty qalasynyń ekologııalyq ahýalyn jaqsartý boıynsha usynystaryn ortaǵa saldy.
Atap aıtqanda, megapolıstiń jeke sektoryn gazben qamtý aýa sapasyn turaqtandyrýǵa oń áser etedi.
Partııa músheleriniń sózinshe, búginde Almatydaǵy aýanyń lastanýy qalypty kólemnen 11 ese kóp.
Sezd barysynda ortaǵa salynyp, talqyǵa túsken mańyzdy problemalar partııa otyrysyń hattamasyna engizildi.
Tıisinshe, ony sheshý boıynsha usynystar ázirleý, Úkimet tarapynan qolǵa alynǵan isterge qoldaý tanytý jumystary júrgizilmek.