Astanada Batys aınalma jol boıynsha qozǵalys ashyldy

ASTANA. 8 qazan. QazAqparat - Astanada qazannyń 7-nen 8-ne qaraǵan túni №12, 14, Ýgolnaıa kóshesinen Sh.Beısekova kóshesine deıingi ýchaskede Kishi kóliktik aınalma joldyń quramyna kiretin Batys aınalma jol boıynsha qozǵalys ashyldy. Bul týraly búgin qalanyń atalǵan bóligindegi qozǵalystyń ashylýyna arnalǵan baspasóz máslıhatynda belgili boldy.

«Bıyl jalpy qaladaǵy qozǵalysty jeńildetýge jol beretin Sh.Beısekova kóshesinde qozǵalys ashyldy. Kishi kólik aınalma jolynyń uzyndyǵy 35 shaqyrym. Búgingi tańda 20,5 shaqyrym joldyń qurylysy aıaqtaldy. Bul aınalma jol qalanyń ortalyq bóligine túsetin salmaqty azaıtady, táýligine 90 myń kólikti ótkize alady. Beısekova kóshesi oń jaǵalaýdan sol jaǵalaý baǵytyndaǵy negizgi kólik aǵyny bolyp tabylady. Ol Saryarqa (Turan) dańǵylyndaǵy qozǵalysty jeńildetpek. Ózderińiz biletindeı, Saryarqa (Turan) dańǵylymen táýligine 70 myń kólik júrip ótedi. Sonyń ishinde 10%-ǵa jýyǵy - júk kólikteri. Biz kólik aǵynyn 25-30% tómendetemiz», - dep habarlady elordalyq Jolaýshylar kóligi jáne avtomobıl joldary bóliminiń basshysy Rashıd Amanjolov.

Aıta keteıik, Turan dańǵylyndaǵy kópir arqyly orta eseppen táýligine 70 myń kólik júrip ótedi. Bul rette, Esil ózeni arqyly Sh.Beısekova kóshesi boıynsha qozǵalysty ashý Turan dańǵyly, Saryarqa, Tilendıev jáne Seıfýllın kóshelerindegi kólik tyǵyzdyǵyn 40% azaıtady.

Astana.kz saıtynyń jazýynsha, birinshi kezekte, bul baǵyttar boıynsha bógelý jaǵdaılarynyń oryn alýynyń sebebi bolyp tabylatyn Astana qalasy arqyly ótetin úlken júk kólikteriniń júrýi toqtatylady. Jalpy alǵanda, Kishi kólik aınalma joly, atalǵan magıstraldardan basqa, Bógenbaı batyr, Abylaı han, Sh. Kudaıberdiuly, Jeńis, Momyshuly dańǵyldaryndaǵy jáne Qorǵaljyn tas jolyndaǵy kólik tyǵyzdyǵyn azaıtýǵa septigin tıgizedi.