Astanada bas josparda mektep bolýy tıis jerge 18 qabatty úı salynyp jatyr – Bas prokýratýra

ASTANA. QazAqparat – 199 egjeı-tegjeıli josparlaý jobasy elordanyń bas josparyna qaıshy keledi. Bul týraly Bas prokýror Berik Asylov Májilis depýtattarynyń saýalyna joldaǵan jaýabynda málim etti, dep habarlaıdy QazAqparat tilshisi.

«Prokýrorlyq tekserýler jergilikti atqarýshy jáne qadaǵalaýshy organdar tarapynan qala qurylysy salasyna qajetti baqylaý júrgizilmeıtinin anyqtady. Birqatar óńirde áleýmettik mańyzdaǵy nysandar qalanyń bas josparynan negisiz shyǵarylady. Al qoǵam arasynda mektep pen aýrýhana oryndarynyń tapshylyǵy jıi talqylanady» delingen jaýapta.

Berik Asylov bul tendentsııaǵa el astanasynan mysal keltiredi.

«Mysaly, Astana qalasynda mekteptiń ornyna (900 oryndyq) «SAT Group Project» JShS 18 qabatty turǵyn úı turǵyzyp jatyr. Astana ákimdiginiń baqylamaýy saldarynan qurylys salýshy kompanııa skverdiń ornyna «Grey Plaza» bıznes ortalyǵyn salyp tastaǵan. Jalpy 199 egjeı-tegjeıli josparlaý jobasy elordanyń bas josparyna qaıshy keledi jáne 2035 jylǵa deıingi jańa qala qurylysy qujatynyń jobasyna enip ketken», - dep jazady Bas prokýror.