Astanada balyqtardyń jappaı qyrylýynyń sebebi aıtyldy

ASTANA. QazAqparat - Elordadaǵy Almaty aýdany aýmaǵyndaǵy Aqbulaq ózeninde balyqtardyń jappaı qyrylýyna ekologııalyq lastaný sebep bolýy yqtımal. Bul týraly «QazAqparat» tilshisine Astana qalasy ákimdiginiń «JasNur» óndiristik-sharýashylyq kásiporny» MKQK Tabıǵat qorǵaý bóliminiń jetekshisi Jarylǵasyn Ábdikárimov málim etti.

«Sýdyń jáne balyqtyń synamalaryn alyp, zerthanaǵa ótkizdik. Endi, zerthananyń qorytyndysy boıynsha sizderge tolyq maǵlumat beremiz. Balyq ósirýshi mamandarmen, tabıǵat resýrstar basqarmasymen birlese tekserý júrgizdik. Atap aıtqanda, balyqtyń ólgen jerinen, sý kelip jatqan aýmaqtan, sondaı-aq odan joǵary jaqtan taǵy bir jerden, ıaǵnı úsh jerden sýdyń synamasyn alyp, zerthanaǵa tekserýge berdik. Bizdiń oıymyzsha, bul oqıǵa sýdyń kishkene ekologııalyq lastanýynan bolǵan»,-dep toqtaldy maman.

Onyń sózine qaraǵanda, sýdyń quramyna turaqty aeratsııa, tazartý sharalary jasalyp otyrýy kerek. Sonymen qatar sýdyń quramy durys bolýy úshin balyqtandyrý sharasynyń kólemin ulǵaıtý qajet.

«Ózderińiz kórgen shyǵarsyzdar, ol jerde móńke balyqtar (karas) bolǵan, ıaǵnı negizinen usaq balyqtar. Sonymen qatar, 1,5 shaqyrym qashyqtyqta balyqtar kóbinese muzdyń astynda qalyp qoıǵan, betine shyqqandaryn qustar jegen. Sol mańnyń joǵary jaǵynda laılanyp turǵan bir oshaq bar. Múmkin osy faktor áser etip jatyr ma degen tujyrymdamyz. Jalpy, balyqtyń aýrýy nemese basqa joldarmen ýlanýy  sekildi birqatar sebepter áser etýi yqtımal. Eger de zerthana osyny dáleldese, onda shara qoldaný kerek», - dedi Jarylǵasyn Ábdikárimov.

Aıta keteıik, áleýmettik jelide Astana turǵyny Aqbulaqtaǵy balyqtyń jappaı qyrylyp, sý betinde qalqyp júrgen vıdeosyn júktegen edi.