Astanada balany mektepke daıyndaý qansha turady

<p><strong>ASTANA. KAZINFORM &ndash; Jańa oqý jylynyń bastalýyna az ǵana ýaqyt qaldy. Bul rette, ata-analar balalaryna mektep formasyn, keńse taýarlaryn jáne ózge de zattardy satyp alýǵa kirisip ketti. Ádette, mundaı taýarlardyń túr-túri mektep jármeńkelerinde usynylatyny belgili. Bıyl elordada mektep jármeńkeleri az uıymdastyrylyp jatqan joq. Onyń biri EHRO halyqaralyq kórme ortalyǵynyń alańynda ótip jatyr. Kazinform agenttiginiń tilshisi jármeńkege arnaıy baryp, satýshylarmen jáne ata-analarmen sóılesip, balany mektepke daıyndaý qansha turatynyn anyqtaýǵa tyrysty.</strong></p>

Astana turǵyny Ásem Qurmanǵalıevanyń eki balasy bıyl 5-synypqa barady. Ol jyl saıyn mektep shyǵyndarynyń smetasyn jasaýdy ádetke aınaldyrǵan.

«Keńse taýarlary rıýkzakpen birge bir balaǵa 15-16 myń teńgege shyǵady. Dápterlerdiń baǵasy ártúrli, bir jerde 5 teńgeden, tipti, 50 teńgeden satylýda. Rıýkzaktardyń baǵasy 6 myń teńgeden bastalady. Balalardyń jasy ulǵaıǵan saıyn zattardy tańdap, jańartýdy ótinedi, - deıdi Ásem Qurmanǵalıeva.

Foto: Soltan Jeksenbekov/Kazinform

Onyń aıtýynsha, bıyl keńse taýarlarynyń baǵasy ótken jyldyń deńgeıinde eken. Biraq, mektep formasy aıtarlyqtaı qymbattaǵan.

«Bir balaǵa, meıli ul, qyz bolsyn, bir mektep formasynyń jıyntyǵy 25 myń teńgeden bastalady. Oǵan kóılek, ıýbka, shalbar kiredi. Kıimniń baǵasy 5-6 myń teńgege óskenin ańǵaryp otyrmyn», - dedi ol.

Mektep kıimderin Túrkııadan jetkizetin satýshylar da baǵanyń óskenin rastap otyr. Muny dollar baǵamynyń ózgerýimen baılanystyrady.

Foto: Soltan Jeksenbekov/Kazinform

«Baǵalar sál kóterildi, sebebi, dollar baǵamy bizde de, Stambýlda da ósti. Dese de, biz zattardyń baǵasyn qoljetimdi qylýǵa tyrysamyz. Keıbir otbasyda birneshe oqýshy bar bolǵandyqtan ata-analarǵa qıyn. Sondyqtan jeńildikter jasaýdy esten shyǵarǵan emespiz. Baǵalar eń kóp degende 2 myń teńgege ósti. Ádette ata-analar dúkenge kelip, balany 50 myńǵa kıindiredi. Mundaı jaǵdaıda biz rıýkzakty tegin beremiz, - deıdi Dınara Muqash.

Ol bıyl aıaq kıim áldeqaıda arzan ekenin alǵa tartyp otyr. Máselen, bylǵary aıaq kıimdi 15-18 myń teńgege satyp alýǵa bolady eken.

Mektep kıimin Túrkııaden jetkizetin taǵy bir satýshy Natalıa Melnıkova mamyr aıynda taýardyń baǵasy arzan bolǵan kezde satyp alypty. Sondyqtan baǵany tek 500-1000 teńgege ǵana kótergen.

«Eger mektep taýaryn, jalpy kez kelgen zatty suranys tómen kezde satyp alsańyz tıimdi bolady. Men taýardy mamyrda satyp aldym. Ol kezde dollar baǵamy qalypty bolǵan edi. Qazirgi dollardyń baǵamymen eseptesek, belgili bir zattarǵa 500-1000 teńge ǵana qosylyp otyr. Mysaly, byltyr jeıdeler 6 myń teńgeden, al bıyl 6,5 myń teńgeden satylyp jatyr. Biraq qyrkúıekke taıaý satyp alsańyz qymbatqa túsedi. Sebebi, biz dollar baǵamyna táýeldimiz», - dep túsindirdi Natalıa Melnıkova.

Óz kezeginde otandyq óndiristi usynyp otyrǵan satýshy-keńesshi Elena Kırıakova onyń kompanııasy bıyl baǵany kótermegenin aıtty. Ol kóbine balasyn birinshi synypqa beretin ata-analar turaqty klıentke aınalǵanyn, bir balaǵa mektep formasynyń tolyq jıyntyǵy shamamen 38 myń teńge shyǵatynyn jetkizdi.

Foto: Soltan Jeksenbekov/Kazinform

«Birinshi synyp oqýshysy úshin ıýbka - 9600 teńge, jılet - 9600 teńge, bomber - 12 900 teńge, galstýk - 1300 teńge jáne kóılek 4500 teńgeden satylady. Barlyǵy – 37 900 teńge. Biz, kóbine, birinshi synyp oqýshylaryna kıim usynamyz», - deıdi ol.

Otandyq óndirýshi az qamtylǵan otbasylardan shyqqan balalarǵa, múmkindigi shekteýli balalarǵa, sondaı-aq úsh nemese odan da kóp balany kıindiretin ata-analarǵa 20% jeńildik usynatynyn aıtty. Bıyl sý tasqynynan zardap shekkenderge de 20% jeńildik qarastyrylǵanyn atap ótken jón.

Foto: Soltan Jeksenbekov/Kazinform

Aıta ketý kerek, Elorda ákimdiginiń qoldaýymen ótip jatqan «Kids EXPO. Balalar álemi» jármeńkesinde az qamtylǵan otbasylardan shyqqan 40 oqýshyǵa rıýkzaktar tegin berildi. Mundaı kómekti úsh bala tárbıelep otyrǵan Rahııa Nurlybaeva aldy. Onyń aıtýynsha, bir balany mektepke daıarlaýǵa mektep formasy men oqý quraldaryn qosa alǵanda shamamen 60 myń teńge jumsalady. Úsh balaǵa jyl saıyn shamamen 150-160 myń teńgesin sanap beredi eken.

Foto: Soltan Jeksenbekov/Kazinform

Astananyń taǵy bir turǵyny Quralaı Іlııasova jyl saıyn balasyn mektepke daıyndaýǵa 100 myń teńge jumsaıtynyn atap ótti.

Esterińizge sala keteıik, 1-31 tamyz aralyǵynda Astananyń ár túkpirinde mektep jármeńkeleri ótýde. Atap aıtsaq:

- «Aımaqtaý» SÚ, 1 tamyzdan 5 qyrkúıekke deıin, jumys ýaqyty saǵat 9:00-20:00 aralyǵy;

- «Tulpar» SÚ, 1 tamyzdan 5 qyrkúıekke deıin, jumys ýaqyty saǵat 10:00-21:00 aralyǵy;

- «Magnum» sýpermarketi (Turan dańǵyly, 55D), 3 tamyzdan 1 qyrkúıekke deıin táýlik boıy jumys isteıdi;

- «Anvar» sýpermarketi (Turan dańǵyly, 45), 3 tamyzdan 1 qyrkúıekke deıin, jumys ýaqyty saǵat 9:00-22:00 aralyǵy;

- «Tumar» SÚ (Syǵanaq kóshesi, 1B), 1 tamyzdan 15 qyrkúıekke deıin, jumys ýaqyty saǵat 10:00-22:00 aralyǵy;

– «Saryarqa» OSO (Turan dańǵyly, 24), 15 tamyzdan 1 qyrkúıekke deıin, jumys ýaqyty saǵat 10:00-22:00 aralyǵy;

- «Rahmet» SO, 5 tamyzdan 31 tamyzǵa deıin, jumys ýaqyty saǵat 10:00-22:00 aralyǵy;

- «Djafar» SO, 5 tamyzdan 31 tamyzǵa deıin, jumys ýaqyty saǵat 10:00-22:00 aralyǵy;

- «Kóktal» OSO, 5 tamyzdan 31 tamyzǵa deıin, jumys ýaqyty saǵat 10:00-20:00 aralyǵy;

- «Ásem» SO, 5 tamyzdan 31 tamyzǵa deıin, jumys ýaqyty saǵat 10:00-20:00 aralyǵy;

- «Astana Mall» OSO, 3, 4, 10, 11, 17, 18, 24, 25, 31 tamyz kúnderi, jumys ýaqyty saǵat 10:00-17:00 aralyǵy;

- «Arýjan» OSO, 3, 4, 10, 11, 17, 18, 24, 25, 31 tamyz kúnderi, jumys ýaqyty saǵat 10:00-17:00 aralyǵy.

Sondaı-aq, Astanada 1 tamyzdan 30 qyrkúıekke deıin jetim balalardy, az qamtylǵan jáne kóp balaly otbasylardan shyqqan balalardy mektepke daıyndaýǵa kómek kórsetýdi maqsat etken «Mektepke jol» aktsııasy jalǵasatynyn atap ótken jón.