Astanada balalarǵa arnalǵan travmatologııalyq pýnkt ashyldy

<p>Astanada №2 qalalyq emhananyń bazasynda Saryarqa jáne Baıqońyr aýdandarynyń balalarǵa medıtsınalyq kómek kórsetetin qosymsha travmatologııalyq pýnkt ashyldy. Onyń ashylýyna elorda ákiminiń orynbasary Evgenıı Glotov qatysty, dep habarlaıdy<a href="https://kaz.inform.kz/" target="_blank" rel="noopener"> Kazinform </a>elorda ákimdiginiń resmı saıtyna silteme jasap.&nbsp;</p>

«Búgin biz balalarǵa arnalǵan travmatologııalyq pýnktiń ashylýynda bas qosyp otyrmyz. Elordada jaraqattarmen shuǵyl kómek kórsetýdi №2 kópsalaly qalalyq balalar aýrýhanasy júzege asyrady. Balalar sanynyń artýy men ótinishterdiń kóbeıý máselesi aldymyzdan shyqty. Bıyl 70 myńnan astam bala №2 balalar aýrýhanasynyń travmatologııalyq pýnktine júgindi, bul ótken jyldyń kórsetkishterinen edáýir asyp tústi. Bul pýnkttiń ashylýy balalarymyzdyń densaýlyǵy úshin mańyzdy», – dep atap ótti qala ákiminiń orynbasary Evgenıı Glotov.

Foto: gov.kz

№2 kópsalaly qalalyq balalar aýrýhanasynyń travmatologııalyq pýnktine ótinishterdi taldaý nátıjesinde, tek 5%-y kórsetilimder boıynsha aýrýhanaǵa jatqyzýdy talap etedi. Al qalǵandaryna travmatologııalyq pýnktiń ózinde shuǵyl medıtsınalyq kómek kórsetiledi. Sodan keıin olardy ambýlatorııalyq baqylaý úshin úıine jiberedi. Bul týraly qalalyq qoǵamdyq densaýlyq saqtaý basqarmasynyń basshysy Álııa Rústemova málimdedi.

«Ásirese, emdeýdiń negizgi bóligi jeńil jaraqattar, kógerýler t.b. ekenin atap ótken jón. Osyǵan baılanysty osy travmatologııalyq pýnktiń ashylýy №2 MGDB janyndaǵy negizgi travmatologııalyq pýnkke túsetin júktemeni azaıtýǵa múmkindik beredi jáne osylaısha balalar ýaqytyly jáne qoljetimdi medıtsınalyq kómekpen qamtamasyz etiledi dep oılaımyn. Sonymen qatar aýrýhanaǵa jatqyzý qajet bolǵan jaǵdaıda, balalar №2 MGDB mamandandyrylǵan travmatologııalyq bólimshesine jetkiziledi, onda olarǵa barlyq qajetti medıtsınalyq kómek kórsetiledi», – dedi Álııa Rústemova.

Aıta keteıik, ortalyqta rentgendik dıagnostıka bólimshesi, tańý, gıps jáne emdeý kabınetteri jumys isteıdi. Bólimsheniń dárigerlik quramynda tájirıbeli travmatolog pen medıtsına mamandary bar. 

Foto: gov.kz

Sonymen qatar búginde qalalyq emhanalarda №4, 5, 6, 7, 9, 10 saǵat 8:00-den 20:00-ge deıin shuǵyl 4-sanattaǵy balalarǵa alǵashqy medıtsınalyq kómek kórsetý úshin jedel járdem bólimsheleri jumys isteıdi.

Sondaı-aq jaraqat alǵan balalarǵa shuǵyl kómek №2 kópsalaly qalalyq balalar aýrýhanasynda kórsetiledi. Ol táýlik boıy elorda turǵyndaryna shuǵyl, josparly hırýrgııalyq, travmatologııalyq kómek kórsetedi.