Astanada balalardyń qaýipsizdigine qatysty profılaktıkalyq aktsııa ótip jatyr

<p>ASTANA. KAZINFORM &ndash; Astanada balalardyń jaraqattanýy týraly, atap aıtqanda, kóppáterli turǵyn úı keshenderiniń terezelerinen balalardyń qulamaýynyń aldyn alý jáne qurylys nysandarynda qaýipsiz eńbek jaǵdaıyn qamtamasyz etý jóninde atqarylyp jatqan jumystar pysyqtaldy. Bul másele qala ákiminiń orynbasary Eset Baıkenniń tóraǵalyǵymen ótken jıynda talqylandy, dep jazdy elorda ákimdiginiń resmı saıty.</p>

Jıynda kópqabatty turǵyn úılerden balalardyń qulaýy men jaraqattanýynyń aldyn alý, qurylys nysandaryndaǵy óndiristik jaraqattaný, tereze sańylaýlaryna arnalǵan qorǵanysh qulyptaryn ornatý normalarynyń oryndalý máseleleri qaralyp, Astana qalasy Tótenshe jaǵdaılar departamenti bastyǵynyń orynbasary Erik Muhametqalıev pen Astana qalasynyń Qalalyq orta sapasy jáne baqylaý basqarmasy basshysynyń orynbasary Erlan Ismaǵulov baıandama jasady.

Erik Muhametqalıevtiń sózinshe, barlyq memlekettik organdar men turǵyndar arasynda balalar jaraqatynyń aldyn alý, órt qaýipsizdigin saqtaý boıynsha keshendi túsindirý jumysy úzbeı júrgizilip keledi.

«Búginde elimizde kóppáterli turǵyn úılerdegi órtterdiń aldyn alý boıynsha aýqymdy profılaktıkalyq jumys júrgizilýde, onyń aıasynda balalardyń jaraqattanýynyń aldyn alý maqsatynda paralleldi túrde túsindirý júrgizilýde. Sondaı-aq terezeden qulaý saldarynan balalardyń jaraqattanýy men ólim jaǵdaılarynyń artýyna baılanysty Astana qalasy Tótenshe jaǵdaılar departamenti 2024 jyldyń 16 shildesinen bastap «Qaýipsizdik qulyp» aptalyǵy profılaktıkalyq aktsııasyn bastady. Aktsııanyń birinshi kúni elordada ornalasqan 2780 kópqabatty turǵyn úıdiń 406-sy qamtyldy», – dedi ol.

Jazataıym oqıǵalar bolǵan qurylys nysandarynda tekserý is-sharalarynyń atqarylyp jatqan jumystaryna toqtalǵan Erlan Ismaǵulov búgingi tańda memlekettik eńbek ınspektorlary 11 qurylys nysanyn tekserip, aldaǵy ýaqytta jumystyń qarqyndy júrgiziletinin jetkizdi.

Qala ákiminiń orynbasary Eset Baıken turǵyndardyń qaýipsizdigi qashanda basty nazarda bolý kerektigin basa aıtyp, jaýapty taraptardyń jumysyna salǵyrttyq tanytýyna bolmaıtynyn eskertti.