Astanada balalar qaýipsizdigine qatysty arnaıy jol kartasy daıyndalýy múmkin

<p>Elordada balalardyń qaýipsizdigin qamtamasyz etý máselesimen aınalysatyn arnaıy jumys tobyn qurý kerek. Bul týraly qalalyq máslıhat depýtaty Vladıslav Sergeev aıtty, dep habarlaıdy <a href="https://kaz.inform.kz/" target="_blank" rel="noopener">QazAqparat</a> tilshisi.</p>

Búgin Astana qalasy máslıhatynyń kezekten tys sessııasynda depýtattar bilim berý uıymdaryndaǵy balalar qaýipsizdigi máselesin kóterdi.

«Meniń oıymsha, balalar qaýipsizdigi máselesine erekshe nazar aýdarý kerek. Jalpy, osy baǵyttaǵy problemany sheshýge aıtarlyqtaı qomaqty qosymsha qarajat kerek bolmaıdy. Jaqynda qalada balalarǵa qatysty eki oqıǵa tirkeldi. Sondyqtan turaqty komıssııa múshelerinen jáne basqarma qyzmetkerlerinen quralǵan jumys tobyn nemese birlesken komıssııa qurýdy usynamyn. Atap aıtqanda, balalardyń qaýipsizdigi boıynsha jol kartasyn daıarlaý qajet», - dedi V. Sergeev.

Onyń sózine qaraǵanda, sýıtsıdke jol bermeý taqyryby óte mańyzdy, sondaı-aq býllıng boıynsha jaǵdaı da ýshyǵyp barady.

«Sondyqtan bul máselege qatysty tıisti jumys tobyn qurýdy usynyp otyrmyn. Oǵan máslıhat depýtattary qosylady. Qazirden bastap bul baǵyttaǵy jumystarǵa kirisý kerek. Eger qajet bolsa, qarjylandyrý taqyrybyna da oralamyz. Ázirge, osy jumystardy iske asyrýǵa qosymsha qarajat kerek emes», - dedi depýtat.

Eske salsaq, 25 qyrkúıek kúni Astanada oqýshy mektep baspaldaǵynan qulap, aýrýhanaǵa tústi.

20 qyrkúıekte elordada jasóspirim joǵary qabattan sekirip, kóz jumdy.