Astanada balabaqshanyń metall qorshaýyn urlaǵan er adamdar ustaldy

ASTANA. QazAqparat – Elordada balabaqshanyń 15 dana metall qorshaýy urlandy, dep habarlaıdy QazAqparat Astana qalasy PD baspasóz qyzmetine silteme jasap.

Baıqońyr aýdanynyń polıtseıleri jedel izdestirý is-sharalaryn júrgizý kezinde buryn sottalǵan 46 jáne 33 jastaǵy eki qala turǵynyn ustaǵan. Olardyń jumys istemeıtin balabaqshany aldyn ala baıqap, urlyqqa barǵany anyqtaldy. Kúndizgi ýaqytta quny 3 mln 760 myń teńge bolatyn 15 dana metall qorshaýdy alyp shyqqan. Urlanǵan qorshaýdy kúdiktiler metall qabyldaý pýnktine tapsyrýdy josparlaǵan, alaıda olardy polıtsııa ustady.

Kúdiktilerge qatysty «Urlyq» baby boıynsha sotqa deıingi tergeý amaldary júrgizilip jatyr. Ustalǵandar kinálaryn moıyndady. Olardyń elorda aýmaǵynda buryn jasalǵan osyǵan uqsas qylmystarǵa qatysy bar-joǵy tekseriledi.