Astanada balabaqsha tárbıeshisi erekshe balany uryp-soqqan
Alǵash ret áıel bıyl qańtarda «Balam-aı» balabaqshasynda ulyn urǵanyn anyqtaǵan. Atalǵan fakti boıynsha qylmystyq is qozǵalyp, tergeý sharasy jalǵasýda. Osy oqıǵadan keıin elordalyq Jumyspen qamtý jáne áleýmettik qorǵaý basqarmasy astanalyq anaǵa qala ákimdigine qarasty «Nurly júrek» áleýmettik qyzmet kórsetý ortalyǵyna aýystyrýdy usynǵan.
«Biz aýysýǵa kelistik. Ortalyqtan oryn da qańtarda bóldi, biraq biz 1 sáýirde bardyq. 2,5 aı úıde otyrdyq, psıhologııalyq turǵydan balamdy basqa ortalyqqa berýge daıyn bolmadym. Bolǵan jaǵdaı qıynǵa soqty. 2 mamyrda balam úıge denesi kógerip, syzat, jaraqatpen keldi. Sosyn beınebaqylaý kamerasyn qaraý úshin ortalyqqa bardym», - dedi Ásel balasymen bolǵan jaıt týraly aıta kele.
«2 mamyrdaǵy jáne sáýir aıynyń sońyndaǵy birneshe kúnniń beınejazbasyn qarap shyqtym jáne tárbıeshi kómekshisiniń balany júıeli túrde uryp-soqanyn bildim. Barlyq beınejazbada kómekshi balamdy urady, julqylaıdy. Buǵan deıin de balamdy uryp-soqqannan keıin, men oılanbastan 112-ge qońyraý shalyp, aryz jazdym», - dep tolyqtyrdy ol.
Astanalyq Ásel — kópbalaly ana, onyń tórt balasy bar. Atalǵan ortalyq úıge jaqyn bolǵan soń jáne qarjylyq jaǵdaıyna qaraı balasyn bergen.
«Endi odan ári ne isteý kerektigin oılanyp otyrmyn. Balamdy erekshe balalarǵa arnalǵan jeke ortalyqqa bereıin desem, ol qymbat. Al tegin ortalyq bizge jaqyn mańda joq. Basqa balabaqshada da osyndaı jaǵdaıdyń qaıtalanbasyna senim joq», - deıdi ol.
Osy oraıda Ásel memlekettik organdardan balabaqshalarda onlaın qadaǵalaı alatyndaı beınebaqylaý kamerasyn ornatýdy suraıdy.
Elordanyń polıtsııa departamentiniń málimetinshe, 3 mamyrda saǵat 19:48-de elorda turǵyny 6 jasar ulyna qalanyń ońaltý ortalyqtarynyń birinde jasalǵan qatygezdik faktisi boıynsha aryz túsirgen.
«Almaty» aýdandyq polıtsııa basqarmasy Qylmystyq kodekstiń 140-baby boıynsha «Kámeletke tolmaǵan balany tárbıeleý jónindegi mindetterdi oryndamaý» aıybymen sotqa deıingi tergep-tekserý bastaldy», - delingen polıtsııa málimetinde.
Aqparatta aıtylǵandaı, atalǵan fakti boıynsha qajetti saraptama taǵaıyndaldy.
«Qylmystyq-protsestik kodeksiniń 201-baby negizinde tergeý múddesinde sotqa deıingi tergep-tekserýdiń ózge de derekteri jarııa etilýge jatpaıdy», - deıdi vedomstvodan.
Sondaı-aq, bolǵan oqıǵaǵa qatysty elordanyń jumyspen qamtý jáne áleýmettik qorǵaý basqarmasy resmı túsinikteme berdi.
«03.05.2023 jyly ata-analar beınebaqylaý kameralaryn qaraý kezinde sanıtar tarapynan «Nurly júrek» áleýmettik qyzmet kórsetý ortalyǵynyń tárbıelenýshisine dóreki qarym-qatynas jasaý faktisi anyqtaldy. Polıtsııa shaqyrylyp, atalǵan fakti tirkeldi. Qazirgi ýaqytta Almaty aýdandyq polıtsııa bóliminiń qyzmetkerleri sotqa deıingi tergeý júrgizýde.
4 mamyrda mekeme dırektorynyń № 02-03/168 buıryǵymen QR Eńbek kodeksiniń 52-baby 14-tarmaǵy, 1-tarmaǵy negizinde balaǵa qorlyq kórsetken qyzmetkermen eńbek sharty buzyldy.
Mekemede balalarǵa qatysty zańsyz áreketterge jol bermeý boıynsha qyzmetkerlermen turaqty negizde áńgimeler men dárister ótkizilip turady. Joǵaryda atalǵan qyzmetkerge qylmystyq jáne ákimshilik jaýapkershilik týraly birneshe ret eskertilgen (qolhat bar)», - delingen jumyspen qamtý jáne áleýmettik qorǵaý basqarmasynyń habarlamasynda.
Eske sala ketsek, bıyl qańtarda elordada erekshe balalardy uryp-soqqan astanalyq tárbıeshiniń ústinen qylmystyq is qozǵalǵan edi.
Іshki ister mınıstrliginiń aqparatynsha, 17 qańtarda polıtsııaǵa elorda turǵyny «Balam-Aı» balany damytý ortalyǵynda onyń kámeletke tolmaǵan ulyna qatygezdikpen qaraý faktisi boıynsha júgindi.
Keıin elimizdiń bas prokýrory Berik Asylov atalǵan oqıǵanyń mán-jaıyn anyqtaýdy óz baqylaýyna alatynyn málim etti.