Astanada balabaqsha aqysy kóterilýi múmkin

ASTANA. QazAqparat – Elordada memlekettik balabaqshalarǵa ata-ana tóleıtin tamaq aqysyn ósirý usynyldy. Baǵany kóterýdiń sebebin Astana qalasy bilim basqarmasynyń basshysy Qasymhan Senǵazyev túsindirip berdi, dep habarlaıdy QazAqparat tilshisi.

«Balabaqshalardyń as máziri tamaqtaný ınstıtýtymen birlese ázirlenip, bekitilgen. Ol byltyr ázirlengen. Osy oraıda, memlekettik balabaqshalarda ata-analar tóleıtin tamaq aqysyn jekemenshik balabaqshalarmen teńestirip, 20 800 teńgege ulǵaıtý týraly usynys bar. Statıstıkaǵa súıensek, qoldanystaǵy as máziri boıynsha 2-3 jastaǵy balalarǵa satyp alynatyn azyq-túlikke jumsalatyn qarajat – 18 837 teńge. Al, 3-6 jastaǵy balalar tamaǵyna 20 800 teńge jumsalady. Degenmen, memlekettik satyp alý portalynda baǵalar budan joǵary», - dedi Qasymhan Senǵazyev elorda máslıhatynyń otyrysynda.

Bilim basqarmasy basshysynyń málimdeýinshe, tamaq aqysy boıynsha basqa óńirlermen salystyrý júrgizilgen.

«Aıtar bolsaq, Almatyda 25 myń teńge, Qaraǵandyda 17 myń teńge, Aqtóbede 16 800 teńge jáne Túrkistan qalasynda 13 633 teńge. Bıyl qyrkúıek aıynan bastap biz memlekettik jáne jekemenshik balabaqshaǵa baratyn turmysy tómen otbasylardyń balalaryn tegin tamaqpen qamtýymyz qajet», - deıdi ol.

Aıta ketsek, Astanadaǵy balabaqsha tárbıeshileriniń 32%-ynda arnaıy bilim joq.