Astanada bala urǵan tárbıeshi 45 myń teńge aıyppul tóleıtin boldy

NUR-SULTAN. QazAqparat – Elordadaǵy jekemenshik balabaqsha tárbıeshisi balaǵa jeńil dene jaraqatyn keltirgen, dep habarlaıdy QazAqparat tilshisi Nur-Sultan qalasy sotyna silteme jasap.

«Bıyl 7 maýsymda elordada jeke balabaqshanyń tárbıeshisi balany urǵan (jeńil dene jaraqatyn aldy). Bolǵan jaıtqa qatysty ákimshilik is qozǵalyp, tárbıeshiniń is-áreketine Ákimshilik quqyq buzý kodeksiniń 73-1-babynyń 1-bóligi boıynsha «densaýlyqqa qasaqana jeńil zııan keltirý» degen quqyqtyq baǵa berildi. Sot otyrysy barysynda aıypty K. óz kinásin tolyq moıyndap, jasaǵan isine ókindi», - delingen resmı aqparatta.

Sottyń sheshimimen balabaqsha tárbıeshisi kináli dep tanylyp, 15 AEK kóleminde aıyppul salyndy.

«Sot taǵaıyndaǵan bap sanktsııasyna sáıkes kinálige 15 AEK mólsherinde aıyppul salý nemese 15 táýlikke qamaý kózdelgen. Sondaı-aq, sot kináli K-nyń jas balasynyń bolýyna jáne jasaǵan isine ókinýine baılanysty jaýapkershilikti jeńildetetin jaǵdaıdy qarastyrady», - dep habarlaıdy qalalyq sottan.

Odan bólek, elordalyq sot Ákimshilik quqyq buzý kodeksiniń 50-baby 2-bóligine sáıkes júkti jáne 14 jasqa deıingi bala tárbıelep otyrǵan áıelderdi qamaýǵa alýǵa bolmaıtynyn aıtyp otyr.

«Osyǵan oraı sot balaǵa dene jaraqatyn keltirgen tárbıeshige 15 AEK kóleminde aıyppul saldy (45 945 teńge)», - deıdi vedomstvodan.

Qaýly zańdy kúshine engen joq.