Astanada «Baqorda» kitaby tanystyryldy

ASTANA. QazAqparat - Búgin elordada qalanyń 20 jyldyq mereıtoıyna arnalǵan «Baqorda» kitabynyń tanystyrylymy ótti. Kitap «Egemen Qazaqstan» kitaphanasy serııasymen jaryq kórgen, dep habarlaıdy QazAqparat tilshisi.

«El gazeti «Egemen Qazaqstan» da bıylǵy jyldyń eń eleýli oqıǵasy Astananyń 20 jyldyǵyna úlken tartýmen kelip otyr. Astanaǵa baılanysty kóptegen dúnıeler jazylyp jatyr. Ózderińiz baıqap otyrsyzdar maýsym aıynyń basynan beri qalamyzdyń mereıtoıyna turaqty túrde birneshe bet  arnap, Astana kúnine, Astana aıshyqtaryna baılanysty kóptegen maqala berip kelemiz», - dedi kitaptyń tanystyrylymynda «Egemen Qazaqstan» gazetiniń basqarma tóraǵasy Darhan Qydyráli.

Onyń aıtýynsha, ótken jyly elordanyń 20 jyldyq mereıtoıyna oraı «Baqorda» dep atalatyn kitap shyǵarý isi qolǵa alynǵan.

«Bul kitap egemenniń tilshileriniń, sholýshylarynyń kúshimen shyqty. Kórkem bezendirilgen. Bul da bizdiń, bas basylymnyń elordaǵa tartýy dep bilińizder. «Baqordanyń» «baq»-y bir jaǵynan buqaralyq aqparat quraldary degendi bildiredi. Ekinshiden Astana shynymen de bizdiń baqordamyzǵa aınalyp otyr», - dedi ol.

Elbasy esimimen egiz atalatyn elorda ómirine arnalǵan bul kitap jalpyulttyq respýblıkalyq «Egemen Qazaqstan» gazetinde jaryq kórgen ártúrli janrdaǵy maqalalardan quralǵan. Basylym tilshileri munda «Otanymyzdyń júregi, Táýelsizdigimizdiń tiregi» atanǵan Astananyń qoǵamdyq-saıası, áleýmettik-ekonomıkalyq jáne mádenı-rýhanı kelbeti tóńireginde oı tolǵaıdy. Kitap taralymy - 1000 dana.