Astanada BAQ ókilderi bılıardtan sheberlik synasty
Qazaqstan Táýelsizdiginiń jáne prokýratýra organdarynyń 25 jyldyq mereıtoıyna oraı uıymdastyrylǵan sharaǵa tanymal jýrnalıst Nurtileý Imanǵalıuly, qoǵam qaıratkeri Namazaly Omash, «Qazaqstan» ulttyq telearnasynyń basqarma tóraǵasy Kemelbek Oıshybaev, «Egemen Qazaqstan» basqarma tóraǵasynyń orynbasary Aıbyn Shaǵalaqov, L.Gýmılev atyndaǵy Eýrazııa ulttyq ýnıversıteti jýrnalıstıka fakýltetiniń dekany Qaırat Saq, belgili sport jýrnalısi, joǵary ulttyq dárejedegi tóreshi Nesip Júnisbaı, jazýshy Sádibek Túgel syndy 20-dan astam jýrnalıst qatysty.
«Kúni keshe ǵana Táýelsizdigimizdiń 25 jyldyq mereıtoıyn atap óttik. Halqymyzdyń osynaý ulyq merekesimen qatar elimizdiń derbes qadaǵalaýshy organynyń qurylǵanyna da shırek ǵasyr tolyp otyr. Ataýly qos merekege oraı uıymdastyrylǵan búgingi týrnırimizdiń jeńimpazdaryn shyn júrekten quttyqtaımyz. Qazaq eliniń Bas prokýratýrasy tek qadaǵalaýshy organ bolyp qana qalmaı, qarapaıym halyq pen bılik ókilderi arasynda dáneker kópir bolýǵa daıyn. Bul baǵytta BAQ ókilderiniń úlesi orasan», - dedi týrnır jeńimpazdaryn quttyqtaǵan QR Bas prokýratýrasy apparaty basshysynyń orynbasary Nurdildá Oraz.
Jarys nátıjesinde bas júlde telejýrnalıst Nurtileý Imanǵalıulyna buıyrsa, ekinshi orynǵa Ulttyq arnadan Álimjan Sabyrjanuly taban tiredi. Al úshinshi oryndy Qazaqstannyń eńbek sińirgen qaıratkeri Nesip Júnisbaıuly men «Kazahstanskaıa pravda» gazetiniń fototilshisi Marat Erjanov bólisti. Týrnır jeńimpazdaryna júldeli marapattar men baǵaly syılyqtar tabys etildi.