Astanada Bahreın Koroldigimen birlesip salynǵan mektep-gımnazııa ashyldy

NUR-SULTAN. QazAqparat – Búgin Nur-Sultanda qala basshylyǵynyń qoldaýymen Bahreın Koroldigimen birlesip salynǵan №91 mektep-gımnazııasy resmı túrde ashyldy, dep habarlaıdy QazAqparat elorda ákimdiginiń resmı saıtyna silteme jasap.

Anatolıı Hrapatyı kóshesinde ornalasqan jańa mektep 1200 oqýshyǵa arnalǵan.

Oqý ornynyń resmı ashylý saltanatyna elorda ákiminiń orynbasary Ashat Oralov jáne Koroldik gýmanıtarlyq qorynyń bas hatshysy Mustafa ál-Saıd bastaǵan Bahreın Koroldiginiń delegatsııasy qatysty.

«Bıyl elimiz úshin erekshe jyl. El Táýelsizdiginiń 30 jyldyǵyn atap ótýdemiz. Mereıtoı qarsańynda elordada úlken jáne aýqymdy mekteptiń qurylysy aıaqtalyp, oqý protsesi bastaldy. Oqýshylar men pedagogterdi dástúrli formatta oqý jylynyń bastalýymen quttyqtaımyz. Pandemııaǵa baılanysty oqýshylar 1,5 jyldan astam ýaqyt qashyqtan oqýǵa májbúr boldy. Qazir oqýshylardyń joǵary deńgeıde bilim alýy úshin barlyq jaǵdaı jasalǵan. Biz árqashan osyndaı ıdeıalar men áleýmettik jobalardy qoldaýǵa daıynbyz. Bolashaqta baýyrlas eldermen osyndaı jobalardy odan ári júzege asyrýdy josparlap otyrmyz», - dedi Ashat Oralov.

Óz kezeginde Mustafa ál-Saıd qala turǵyndaryn Qazaqstan Táýelsizdiginiń 30 jyldyǵymen quttyqtaı otyryp, elimizdiń qarqyndy damýy men jetistikterine tańdanysyn bildirdi.

«Osy mekteptiń ashylýyna qatysqandardyń bárine, qala ákimdigine alǵys aıtqym keledi. Óıtkeni biz bul mekteptiń Qazaqstandaǵy, sondaı-aq Azııadaǵy eń úzdik jáne ádemi mektepterdiń biri bolýy úshin qoldan kelgenniń bárin jasadyq. Mektepte arab tilin úırenýge arnalǵan murajaı men kabınet bar. Munda elimizdiń mádenıeti men dástúrleri týraly bilýge bolady. Bul mektep mádenıet pen ǵylymnyń ortalyǵy bolyp esepteledi. Qazaqstan men Bahreın Koroldiginiń arasyndaǵy baılanys óte tyǵyz», - dep atap ótti Bahreın Koroldiginiń Koroldik gýmanıtarlyq qorynyń bas hatshysy.

Jańa mektep ǵımaratynda 62 kabınet jáne 11 zerthana bar. Munda eńbek kabınetteri, qysh sheberhanasy, 418 oryndyq ashana, sport jáne akt zaldary, kovorkıng aımaǵy, lıngvıstıkalyq kabınetter jáne taǵy basqalary bar.

Mekteptiń oqý tili – qazaq jáne orys. Oqý orny kóptildilik prıntsıpi boıynsha jumys isteıdi. Munda negizgi eki tilden bólek, arab, frantsýz jáne nemis tilderi de oqytylady.

Ǵımarattyń úshinshi qabatynda 5 eldiń – Qazaqstan, Bahreın Koroldigi, Ulybrıtanııa, Frantsııa, Germanııa mádenıetin dáripteıtin mektep murajaıy ornalasqan. Osy murajaıda balalar kóptildilik daǵdylaryn damytady, polıglottar klýby jumys isteıdi.

Sonymen qatar, mektep kitaphanasynda 5 eldiń kórkem ádebıetin tabýǵa bolady.

Qazir mektepte 1 370 bala oqıdy. Oqytý – tegin.

Aıta keteıik, 2021 jyly Nur-Sultanda barlyǵy 15 mektep paıdalanýǵa beriledi, bul 40 myńnan astam oqýshy ornyn quraıdy. Olardyń kópshiligi ashyldy.