Astanada azyq-túlik taýarlarynyń tapshylyǵy joq - ákim orynbasary
«Qalanyń saýda nysandaryna monıtorıng júrgizemiz. Elorda aýmaǵynda azyq-túlik taýarlarynyń tapshylyǵy joq. Qalanyń perımetri boıynsha 6 blokpost qoıylǵan. Barlyq blokpostar boıynsha alǵashqy kúnnen bastap azyq-túlik ónimderin kirý jáne jetkizý boıynsha úzdiksiz jumys jolǵa qoıyldy. Azyq-túlikti jetkizýge qatysty irkilister joq. Barlyq saýda nysandary komendanttyń buıryǵymen shtattyq rejımde jumys isteıdi. Ruqsat etilgen ýaqyt tańǵy saǵat 8-den 22:00-ge deıin», - dedi Erlan Bekmurzaev.
Elorda ákiminiń orynbasary barlyq kásipkerlerdi Nur-Sultan qalasynyń komendanty ázirlegen erejelerdi saqtaýǵa, atap aıtqanda, sórelerden alkogol ónimderin alyp tastaýǵa, belgilengen rejım men jumys kestesin saqtaýǵa shaqyrdy.
«ÁKK áriptesterimen birlesip áleýmettik mańyzy bar azyq-túlik taýarlarynyń baǵasyna kún saıyn monıtorıng júrgizemiz. Baǵany kótergen jaǵdaıda kásipkerlerge eń qatań sharalar qoldanylady», - dedi ol.
Ákimdik ókilderi qalanyń iri saýda jelileriniń fılıaldaryna bardy. Aıta keteıik, elordalyq saýda sórelerinde taýar jetispeýshiligi baıqalmaıdy.
«Qazirgi ýaqytta Nur-Sultan qalasynda Magnum jelisiniń barlyq fılıaldary ashylǵan. Fılıaldardyń jumys tártibi TJ rejımine sáıkes anyqtalǵan. Jaǵdaı turaqtanǵan saıyn fılıaldardyń jumys ýaqyty artady. Fılıaldarda dúrligip jatqan halyq baıqalmaıdy, barlyq áleýmettik mańyzy bar taýar qolda bar. Taýarlardy jetkizý keste boıynsha júrgiziledi, baǵalar turaqty. Biz baǵany kótermedik. Bizben bir komanda retinde jumys istegenińiz úshin seriktesterimizge rahmet. Alkogol satylymnan alynyp tastaldy jáne, satylmaıdy», - dep habarlady Magnum kompanııasynyń aýmaqtyq dırektory Elena Zımenko.
«Tótenshe jaǵdaı rejımin engizý dúkenderdiń jumysyna áser etken joq, bizde barlyq taýarlar bar, tek bizdiń dúkende ǵana emes, búkil jelide de bar. Sabyrlyq saqtaý kerek. Satyp alýshylardan dúrlikpeı, qajettiligine qaraı satyp alýdy suraımyz, óıtkeni taýar barlyǵyna jetedi», - deıdi «Anvar» gıpermarketiniń dırektory Natalıa Krastyn.