Astanada azyq-túlik baǵasyn ósirmeý úshin qandaı sharalar qolǵa alynǵan

NUR-SULTAN. QazAqparat - Nur-Sultan qalasynyń ákimi Altaı Kólginov astanada azyq-túlik qaýipsizdigin qamtamasyz etý úshin qandaı sharalar atqarylyp jatqanyn aıtyp berdi, dep habarlaıdy QazAqparat.

«Azyq-túlik qaýipsizdigi máselesi - basty nazarda. Biz áleýmettik mańyzdaǵy azyq-túliktiń baǵasyn turaqtandyrý úshin birqatar sharalardy júzege asyrdyq. Saýda jelilerine «aınalym mehanızmi» boıynsha bólinetin somany 13 eseden astam - 180 mln teńgeden 2,4 mlrd teńgege deıin ósirdik. Bul áreketimiz áleýmettik mańyzdy taýarlardyń 16 túriniń qunyn ustap turýǵa múmkindik berdi. Sonymen birge, satyp alýdy ulǵaıttyq jáne baǵany turaqtandyrýǵa qatysatyn saýda jelileriniń sanyn 4-ten 12-ge deıin kóbeıttik. Olar - Magným, Astyqjan, Keńmart, Vkýsmart, A2, Metro, Anvar, Rahmet, Aqmol, Smoll, «Astanalyq» bazary, Shapaǵat» dep jazdy shahar basshysy Instagram paraqshasynda.

Ákimniń aıtýynsha, sharýa qojalyqtarymen qosymsha 704 mln teńgege 5 myń tonna kókónis satyp alýǵa forvardtyq kelisim jasalǵan.

Nan ónimderi baǵasyn turaqtandyrýǵa jergilikti naýbaıhanalarǵa 600 mln teńgeden asa qarjy bólingen.

«Bul sharalar áleýmettik mańyzdy azyq-túlik taýarlarynyń baǵasyn ustap turýǵa kádimgideı kómektesti. Birqatar iri saýda jelileri men taýar óndirýshilerdiń basshylyǵymen kezdesý kezinde osyndaı áriptestikti ári qaraı jalǵastyrý jaǵyn talqyladyq. Saýda jelilerine «aınalym mehanızmi» boıynsha bólinetin somany 2021 jyldan bastap ulǵaıtýdy tapsyrdym. Elordada 7 logıstıkalyq keshen bar, 4 kóterme-taratý ortalyǵynyń qurylysy júrip jatyr (úsheýi - jeke ınvestorlardyń esebinen)» dep túıindedi Altaı Kólginov.

Aıta keteıik, ınvestorlar sonymen birge jylyjaı, azyq-túlik bazarlary, kókónis qoımalary, sút zaýyty jáne basqa nysandardy salý jónindegi jeke jobalardy qoldap otyr.

Bul sharalar da azyq-túlik qaýipsizdigin nyǵaıta túsip, naryqty jergilikti taýarlarmen toltyrýǵa muryndyq bolady.