Astanada Ázerbaıjan Respýblıkasynyń 100 jyldyǵy atap ótildi
00:47, 22 Aqpan 2018
ASTANA. QazAqparat - Astana qalasynda Ázerbaıjan Demokratııalyq Respýblıkasynyń 100 jyldyǵyna arnalǵan saltanatty shara ótti, dep habarlaıdy QazAqparat Túrki akademııasy halyqaralyq uıymyna (TWESCO) silteme jasap.
Jıyndy quttyqtaý sózben ashqan Ázerbaıjannyń Qazaqstandaǵy elshisi Rashad Mammadov Ázerbaıjan Respýblıkasynyń tarıhı mańyzy jaıly aıtyp ótti.
Bas keńsesi Bakýde ornalasqan Túrki mádenıeti jáne mırasy qorynyń prezıdenti Gúnaı Efendıeva men TWESCO basshysy Darhan Qydyráli de ázerbaıjan halqyn mereıli datamen quttyqtady.
Sonymen qatar, osy sharaǵa Ázerbaıjannan arnaıy kelgen tanymal mýzykant, osy eldiń eńbek sińirgen ártisi Islam Manafov klassıkalyq mýzykadan kontserttik baǵdarlama usyndy.
Ázerbaıjannyń Qazaqstandaǵy Elshiligi men Túrki mádenıeti jáne mırasy qory birlesip uıymdastyrylǵan shara TWESCO qoldaýymen ótti.