Astanada Azamattyq forým ótip jatyr

ASTANA. QazAqparat - Elordada QR Prezıdenti Nursultan Nazarbaevtyń Qazaqstan halqyna Joldaýynda aıtylǵan áleýmettik bastamalardy iske asyrý aıasynda tıimdi yntymaqtastyqty jasaý baǵyttaryna arnalǵan «Azamattyq qoǵam jáne memleket» atty qalalyq forým ótip jatyr, dep habarlaıdy QazAqparat tilshisi.

Osymen segizinshi ret uıymdastyrylyp otyrǵan alqaly jıynda memlekettik organdar men úkimettik emes uıymdar úshin tıimdi suhbat alańy jáne azamattyq sektordy damytýdyń ózekti máseleleri talqylanýda.

Qazirgi zamanǵy álemdik damýdyń basty baǵyttarynyń biri - áleýmettik-ekonomıkalyq saıası damýdyń ártúrli deńgeıinde úkimettik emes uıymdar róliniń ósýi.  

«Osydan 15 jyl buryn Qazaqstannyń azamattyq alıansynyń bastamasymen elimizde alǵash ret úkimettik emes uıymdar óz jumysyn bastaǵan bolatyn. Astanany óz kezeginde úkimettik emes sektorlardyń basty ortalyǵy deýge bolady. Elimizde jáne Astanada júzege asyrylyp jatqan mańyzdy jobalardyń bári ÚEU qatysýymen ótedi. Forým barysynda atalǵan salaǵa qatysty jaǵymdy jańalyqpen bóliskim kelip otyr, Astanada azamattyq bastamalar ortalyǵynyń qurylysy bastaldy. Odan bólek áleýmettik kásipkerlikti damytýǵa arnalǵan birqatar jobalar qolǵa alynýda. Osy baǵytta arnaıy sala mamandaryn shaqyryp koýcher oqytý kózdelýde. Sol sııaqty elimizdiń barlyq óńirleri boıynsha áleýmettik jobalardyń kartalary jasalady», - dedi QR Qoǵamdyq damý mınıstri Darhan Káletaev.  

Mınıstr óz sózinde osy jyldyń 27-28 qarashasynda Elbasynyń qatysýymen Respýblıkalyq azamattyq forým ótetinin aıtyp ótti. 

 «Búginde ÚEU azamattyq qoǵamdaǵy mańyzdy jumystardy atqarýshy ǵana emes, memlekettik áleýmettik jobalardy júzege asyrýdaǵy senimdi serigine aınaldy. Búginde Astana ákimdigi men 30-dan astam ÚEU birlesip 464 mıllıon teńgege 66 áleýmettik mańyzy bar jobalardy júzege asyrdy. Budan bólek memlekettik baǵdarlamalardy iske asyrýda ÚEU  qoǵamdyq pikirdi eskere otyryp jumys isteý múmkindigin týǵyzady. Sondyqtan búgingi forýmda biz qoǵamdy damytýǵa baǵyttalǵan árbir joba men basqa da sheshilmeı jatqan máselelerdi kóterip, birlesip qarastyratyn bolamyz», - dedi Astan qalasynyń ákimi Baqyt Sultanov. 

Onyń aıtýynsha, qalalyq azamattyq forým sheńberinde úkimettik emes uıymdardy Astana aýmaǵyndaǵy naqty máseleni sheshýge uıymdastyrý týraly bastama talqylanady.

Forým barysynda ÚEU suhbat alańynda Astana qalasynyń ákimdiginiń kestesine sáıkes 4 sektsııalyq is-shara ótkiziledi, azamattyq qoǵam aldynda turǵan máselelerdi sheshý joldary anyqtalyp, usynystar ázirlenedi.  

Budan bólek forým barysynda áleýmettik ıdeıalar men jobalardyń jármeńkesi ÚEU arqyly Astana qalasynda ótkizgen ÚEU eń úzdik 10 áleýmettik jobasy tańdalyp, marapattalady.