Astanada áıgili frantsýzdyq «Notr-Dam de Parı» mıýzıkli qoıylady

ASTANA. QazAqparat - Qazaqstandyqtar jaqyn arada áıgili Vıktor Gıýgonyń romany jelisinde jazylǵan «Notr-Dam de Parı» mıýzıklin tamashalaı alady. Bul týraly OKQ-da ótken baspasóz máslıhaty barysynda «Astana Musical» teatrynyń kórkemdik jetekshisi, «Qazaqkontsert» MKU bas dırektory Ashat Maemırov málimdedi, dep habarlaıdy «QazAqparat» HAA tilshisi.

«Kelesi jyly Astana qalasynyń 20 jyldyq mereıtoıyna oraı, biz «Notr-Dam de Parı» mıýzıklin kórsetýdi kózdep otyrmyz. Bizde qazirgi ýaqytta «Rýhanı jańǵyrý» baǵdarlamasy aıasynda Parıjde ótken jıynda mıýzıkldiń bas prodıýsserimen aldyn ala kelissóz júrgizip qoıdym. Olar seriktese jumys atqarýǵa ázir ekendikterin bildirdi. Búgingi tańda franshızany satyp almaqpyz», - deıdi Ashat Maemırov.

Onyń aıtýynsha, Astanaǵa frantsýz rejısserleri men baletmeısteri kelip, qazaqstandyq áriptesterine sheberlik saǵatyn ótkizedi.

«Bul biz úshin óte aýqymdy tájirıbe bolmaq. Sonymen birge, alǵashqy úsh nómirge  basty róldi oınaǵan Esmeralda men belgili ánshi Patrık Forıdi shaqyrmaqshymyz. Olardyń jolyn dál osy álemge áıgili «Notr-Dam de Parı» ashyp bergen. Bul mıýzıkldiń Gınnestiń Rekordtar kitabyna engenin aıta ketkim keledi», - deıdi ol.

Ashat Maemırov bul jobany júzege asyrýǵa kómektesken adamdardyń barlyǵyna alǵysyn bildirdi.

«Mıýzıkl úshin barlyǵyna zor alǵysymdy bildirgim keledi. Sebebi, ol óte qymbat janr. QR Mádenıet jáne sport mınıstrliginiń qoldaýynsyz biz buǵan qoljetkize almas edik. Sebebi, qalalyq bıýdjetten qarajat alyp otyrǵan kez kelgen teatr mundaı dárejedegi mıýzıkldi qoıa almaıdy», - deıdi Ashat Maemırov.